Islandimit timmisartut amerlanerusut tikittalissasut
Ullumikkut Islandip Nuullu akornanni sapaatip akunneranut pingasoriarluni timmisartoqartarpoq. Air Aiceland Connect juulip aggustillu qaammataanni tallimanngornerit tamaasa timmisartumik angallassisarniarpoq, nalunaarummi allassimavoq.
Icelandairi Sermitsiaq.AG-mut ilisimatitsivoq, ullumi tallimanngornermi aallartittumik, Islandip Kalaallillu Nunaata akornanni tallimanngornikkut timmisartuussisarnertik aallarteqqinneqartoq. Sapaatip akunneranut ataasiarluni Nuup Reykjavikkillu akornanni timmisartoqartassaaq.
Air Greenlandip sapaatip akunneranut marloriarluni, pingasunngornikkut arfininngornikkullu, aqqummi pineqartumi timmisartuussisarnera juunip 17-ani aallartinneqartoq, coronamut tunngatillugu malittarisassat atunngikkaluarlugit, sapaatip akunneranut marloriarluni Islandikkoorluni Savalimmiunut ingerlaqqilluni angalasinnaanermut periarfissiivoq.
- Danmarkimi Islandimilu innuttaasut, ulluni kingullerni 14-ini Islandimiissimasut, Kalaallit Nunaanniissimasut Savalimmiuniissimasulluunniit angalaqatigisinnaavavut, Icelandairimi nunap immikkoortuani pisortaq Dora Eggertsdóttir oqaluttuarpoq.
Angallaffiunerpaami nalinginnaasumik angalasarnerit.
Ilulissat, sapaatip akunneranut arfinillit
Kulusuk, sapaatip akunneranut qulingiluat
Narsarsuaq, sapaatip akunneranut marluk
Nuuk, sapaatip akunneranut pingasut
Amerlanerusunik Kalaallit Nunaannut timmisartuussisarusuttoq
Taassuma erseqqissaatigaa, ingerlatseqatigiiffiup immikkoortortaa Air Iceland Connect, aqqummi pineqartumi timmisartuussisartoq, nunami maani aammaaqqinnermi immikkoortoq siullermi bilitsinik tuniniarneqarsinnaasunik pissarsisinnaasimanngitsoq.
Malittarisassat malillugit, immikkoortoq siulliup ingerlanneqarnerani, timmisartukkut ilaasut sapaatip akunneranut 600-t tikissinnaatitaapput. Ilaasut coroanmik tunillatsissimannginnermut uppernarsaateqassapput, aamma angerlarsimaffimminni imminnut mattuteqqassapput ullullu tallimat qaangiunneranni misissorteqqissallutik imaluunniit tikinnermiit ullut 14-it angerlarsimaannnassapput. Island Savalimmiullu malittarisassanut ilaatinneqanngillat, Kalaallit Nunaannisulli tunillatsissimasoqannginnamik.
Ilaasinnaasunut 600-uusunut neqerooruteqarsinnannginnerup nassataanik, timmisortornermi nunanit tamalaaneersunik ilaasoqarsinnaanngilaq, taamaammat aqqutit ammaaffigisinnaasavut killeqarput, pisortaq nassuiaavoq.
Neqerooruteqarsinnaanermut akuersissunik pissarsiniaqqissasut
Piffissami matumani nalinginnaasuugaluarpoq Kalaallit Nunaanni sumiiffinnut sisamanut timmisartuussisarnerit, takornariat nunarsuarmit tamarmeersut sulinngiffeqarnerminni Islandimi Kalaallillu Nunaani misigisaqarusuttut sapaatip akunneranu arlaleriarluni angallanneqartarlutik.
Timmisartuutileqatigiiffimmut taamaammat pingaaruteqarpoq, bilitsit 600-t taakku ilaannik pissarsinissaq, bilitsit maannamut Air Greenlandip Danmarkimut timmisartuussisarneranut atugassatut tunniunneqartarsimasut.
- Kalaallit Nunaanni oqartussat tamanna pillugu oqaloqatigisimavavut, coronamulli misissortittarnissamut malittarisassat mattusimanissamullu malittarisassat atuunneranni, ilaasussat 600-t nunamut timmisartuunneqarnissaannut peqataasinnaanermut maannamut suli akuerineqanngilagut. Anguniarlugu sulissutigiuarparput, qanittukkullu iluatsikkumaarnera neriuutigalugu, Dora Eggertsdóttir oqarpoq.