Angallanneq
Isornartorsiuineq: Air Greenlandip Uummannaq sumiginnarpaa
Uummannamut tassanngaaniillu ilaasut qaqutiguunngitsumik teknikkikkut ajoquteqartoqarnera pissutigalugu taamaatitsiinnarnernik misigisaqartarput. Ullorpassuarni utaqqinermik kinguneqartarpoq.
Ilaasut allarpassuit assigalugit Kasper Salomonsen januaarip 19-anni Uummannamiit Ilulissanut timmisartortussaagaluarpoq. Kisianni timmisartornissaraluit teknikkikkut ajoquteqartoqarnera pissutigalugu taamaatinneqarput.
- Air Greenland taamatut pisoqartillugu paasissutissiinerluttorujussuuvoq. Ulluni tallimani uninnganinni ataasiarlunga sianerfigineqarpunga, taanna Sermitsiaq.AG-mut oqarpoq.
Kinguaattoortoqakulasoq
Pingasunngornermi timmisartornissaq aamma siullermik nalunaarutigineqaraluarpoq, kingornalu kinguaattooraluarluni angalasoqaannarnissaa nalunaarutigineqarpoq.
- Inuit Uummannameersut angerlarsinnaanngikkaangata, tamaani inuiaqatigiit sapaatip-akunningajak unittoortinneqartarpoq. Uagullu allat nunap ilaani suliffitsinni amigaataalersarpugut, Kasper Salomonsen oqarpoq, taanna sulinerminut atatillugu Uummannamiippoq.
Aatsaat siullermeerluni taama pisoqanngimmat, taassuma ilaasullu allat oqaloqatigisaata taamaatitsinerit kamaatiginerannut pissutaapput.
- Taamatut pisoqaqattaartuarpoq, amerlanertigullu teknikkikkut ajutoornerusarlutik, Air Greenlandip taamaatinneqartumut taarsiussillutik immikkut timmisartuussinngikkaangamik Uummannaq tunulliuppaa.
Ilulissanit qulimiguulimmik atorluni Qasigiannguanut imaluunniit Qeqertarsuarmut timmisartuussinermik ulloq ataatsimik kinguartitsilluni Uummannami ilaasut ingerlaqqinneq ajulertut aaneqartannginneri, Kasper Salomonsenip paasisinnaanngilaa.
Nakorsaatinik amigaateqartoq
Kaaleeraq M. Andersenip aamma taamatitsinerit kinguneri malugai. Taassuma sapaatip-akunnera sinnerlugu gigtimut nakorsaatini pingaarutillit utaqqigaluarpai.
- Pisussinnaarpianngilanga, nakorsaatikka amigaatigigakkit isigisara ajorsigaluttuinnarpoq, taanna Sermitsiaq.AG-mut oqarpoq.
Kaaleeraq M. Andersenip teknikkikkut ajutoornerit pissutigalugit aamma kinguaattoortarnerit misigikkajuttarpai. Qulimiguulik pisoqalisimarpasittoq, taanna aamma Kasper Salomonsen isumaqarput.
Sermitsiaq.AG-p Air Greenlandimit oqaaseqartitsinissani sulissutigaa.