Issittumi Siunnersuisooqatigiiffimmi USA aamma Disney siuttunngussapput

USA-p Issittumi politikkiniminik siammarteriniarnermini Disney pingaarutilimmik inissisimassaaq, tassami Issittumi inuuneq pillugu piviusulersaarusiamik sanasoqassaaq.

Arctic Frontiersip Tromsømi ataatsimeersuartitsinerani Issittumi inuuneq pillugu paasititsiniaasarnissat annertusarneqassasut USA-p Issittumi ambassadøriata saqqummiutissavaa. Tassani Disney suleqatigalugu Issittumi inuuneq qanoq innersoq annertunerusumik paasititsiniaasoqassaaq.

- Issittoq pillugu amerikarmiunut paasissutissiinermi Disney atorneqarsinnaassaaq. Alaska uani kisimi eqqarsaatigineqanngilaq. Norgemi issittarnera amerikarmiunit takorluukkatut isigineqarpoq, piviusorli allaaneroqaaq, ambassadøri Robert Papp oqarpoq.

USA-p issittumi anguniagai pillugit Robert Papp Europami angalavoq. USA Issittumi Siunnersuisooqatigiiffimmi apriilimi siuttutut inissinneqassaaq, tassani Canada paarlassallugu.

Angalanini Sverigemi aallartippaa, Norgeliassaaq kiisalu Københavniliassalluni sapaatip akunnerata naanerani.

Issittup imartaani sakkutooqarnerup annertunerulernissaa Robert Pappimit anguniarneqarpoq, siornatigummi admineraliusareerpoq.

Annaassiniartartut annaassiniarnermilu atorneqartartut taamaasillutik amerlisariaqassapput.

Issittumi inuuneq pitsanngornissaa USA-mit anguniarneqarpoq. Sikup aakkiartornera Alaskamut nukissiornermut silallu kissatsikkiartorneranut eqquissaaq. Sarfaqarniarnikkut aamma dieselitortunik sarfamut atuisoqartariaqalissaaq.

Issittumi sikup aakkiartornerani nunarsuarmi eqquiinnarnani aamma Issittumi immikkoortortoqarfiit eqqorneqartussaapput, tamannalu USA-mit annertunerusumik paasissutissiiffigineqarnissaa anguniarneqarpoq.

USA-mi Issittumi Siunnersuisooqatigiinni siuttuunermini oqaatsit pingaartinneqassapput akisussaaqatigiinneq, unammilligassat periarfissallu.