nunarsuup kissatsikkiartornera
Issittup imartaata sikua ukiut qulingiluassaa milleriarpoq
Uuttortaasarnerit 1978-imi aallartinneqarmatali ukioq manna immap sikua minnerpaaffimmi sisamassaanik angissuseqarpoq
Issittup imartaa kingusinnerusukkut sikusalerlunilu siusinnerusukkut aattalerpoq, aasallu ingerlanerani immap sikuata sinnera siusinnerusumit minneruvoq.
Taamaasilluni ukioq manna immap sikua 1978-imi satellittikkut uuttortaasoqartalerneraniilli minnerpaaffimmi sisamassaanik angissuseqaannarpoq.
Ataatsimut isigalugu
Taamatut paasissutissiivoq DMI.dk, tamannalu peqatigalugu erseqqissarpaa ataatsimut isigalugu taamaaginnartoq. Ukiuni kingullerni qulingiluani immap sikua minnerpaaffimminiilertarsimavoq, 1978-imit ineriartorneq qiviaraanni.
2012 ukioq rekordiliiffiuvoq, immap sikuata minnerpaaffia eqqarsaatigalugu. 2007-mi minnerpaap tullerisimavaa, taavalu 2011-mi minnerpaap pingajoralugu 2015-imilu minnerpaap sisamaralugu.
Issittumi sumiiffinni allanissaaq iernartorneq taamaappoq: Ullut sikuneq ajorfiusut amerliartorput, DMI paasissutissiivoq.
Qaammatinik pingasunik sivisunerusumik
Assersuutigalugu Barentshavimi immap sikoqanngittarnera 1980-ikkut aallartinnerannut sanilliullugu qaammatinik pingasunik sivisunerulersimavoq, Baffinbugtimilu immap sikoqanngittarnera qaammat ataaseq sinnerlugu sivisunerulersimalluni.
Nordøstpassage ammavoq
Nordøstpassage (Europa/Asia avannaqqullugu Atlantikumit Manerassuarmut immakkut aqqut) aamma Sullualuk (Amerika avannarleq avannaqqullugu Atlantikumit Manerassuarmut immakkut aqqut) ukioq manna sikusimanngillat, ikerasakkut M´Clurekut aqqutissaq itisooq ilaannakortumik sikoqaraluartoq.