uranimik taasisitsineq
Isummani mumisippaa: Steen Lyngep uranimut siunnersuunni tunuartippaa
Inatsisartunut ilaasortap Steen Lyngep (A) parteeqamminik tapersersorneqannginnini, partiinillu naalakkersuisooqataasunit akerlilerneqarnini pissutigalugu innuttaasunik taasisitsinissamik isummani allanngortippaa
– Tunuliaquttannit partiinillu naalakkersuisooqataasunit tapersersorneqanngilanga. Tamanna tusaatissatut tigusariaqarpara.
Steen Lynge tallimanngormat KNR-mut taamatut oqarpoq, taassumalu isummani allanngortillugu siunnersuunni tunuartippaa - siunnersuutigigaluaramiuk uranimik piiaanermi atortussiassat piiakkat uranimik akoqassusiata annerpaaffeqartinnissaa innuttaasunut taasissutigitinneqassasoq.
Ataatsimiinnerup kingorna isummani allanngortippaa
KNR allappoq Steen Lyngep partiit naalakkersuisooqataasut ataatsimeeqatigiinnerisa - ataqatigiissaarinermut ataatsimiititaliap ataatsimiinneranik taaneqartup - kingorna isummani allanngortissimagaa.
Taamaasilluni Kalaallit Nunaanni uranimik piaanissamut apeqqutip innuttaasunit taasissutigineqarnissaa pillugu parteeqamminut partiinullu naalakkersuisooqataasunut nakkaannarpoq.