Italiamiut peqatigiiffiata nunatta meerartai ikiorpai
Italiamiut-qallunaat Københavnimi ikinngutigiittut peqatigiiffiat arfininngorpat kalaallit meerartaannut aningaasanik katersuiniassaaq.
Oqalugiarnerit, nipilersornerit nuannisaqatigiinnerlu italiamiut-qallunaat ikinngutigiittut peqatigiiffiata decembarip 5-ianni aningaasanik katersuiniarnermini atussavai. Danmarkimi italiamiorpassuit najugaqarput, tamakkualu tusagassiorfitsigut kalaallit meerartaasa atugaat tusarsimavaat.
- Taamaattumik isumaginninnermut sammisumik julefrokostiliorimavugut kalaallit meerartaat ikiorniarlugit, tamanna aqqutigalugu nuna paasisaqarfiginiarlugu, uagut europap kujataani najugallilt ilisimasaqarfigivallaanngisarput, Gino Rocca, 36-inik ukiulik, Italiallu kujataaneersoq ukiullu qulit sinnerlugit Danmarkimi najugaqarsimasoq oqarpoq.
Aaqqissuussineq ingerlanneqassaaq italiamiut-qallunaat ikinngutigiittut peqatigiiffiannit Serate Italiane-mit.
- Serate Italiane peqatigiiffiuvoq ukiunik sisamanik pisoqaassusilik, tunngavilerneqarsimasoq Danmarkimi italiamiut qallunaallu akornanni paaseqatigiinnissaq pilersinniarlugu; aamma pineqarput atlantikup avannaani qallunaatut innuttaassusillit, Gino Rocca, peqatigiiffiup siulittaasua, oqarpoq.
Aningaasanik katersineq oqalugiarnerlu
Ullormi aningaasanik katersinermi Københavnimi Café Mandelami nereqatigiittoqassaaq Dorrit Hermannilu Red Barnet-ip Kalaallit Nunaanni meeqqanik atugarliortunik sulinera pillugu oqalugiassaaq kiisalu meeqqanik sullissinermut aningaasanik katersiniarluni assigiinngitsunik sammisaqartitsisoqassalluni.
Tamatuma saniatigut nipilersortartut italiamiut, qallunaat kalaallillu ilisimneqartut festernermi malunnartitseqataaqqullugit qaaqquneqarsimapput, aaqqissuussinerlu naggaserneqassaaq qallunaatut juullimi nerersuarnermik DJ-illu italiamiut atorlugit festernermik.
//-->