Ittoqqortoormiit isumasioqatigiinnermut peqataassanngitsoq
Ittoqqortoormiini misileraalluni aalisartoqarnissaa aalisakkerivittaarnissarlu pingaaruteqarluinnartoq piniartut peqatigiiffiata politikerillu ukiorpassuarni oqariartuutigisarsimavaat. Taamakkaluatoq Tasiilami aalisarneq pillugu isumaqsioqatigiittoqarnissaanut Ittoqqortoormiiniik peqataasoqanngilaq.
Qilalikkat qernertat nannullu Ittoqqortoormiini piniarnermik inuussutissarsiuteqarnerannut pingaaruteqarluinnarput, sakkortuumilli killilersuisoqarnerata kingunerisaanik ukiuni kingullerni amerlasuuni Ittoqqortoormiini piniarnermik inuussutissarsiuteqarneq annertuumik eqqugaaqqavoq. Inuuniarnikkut atukkat taamatut inissisimanerat peqqutaalluni piniartut ikileriarsimasut, inuusuttullu piniarnermik inuussutissarsiuteqarnermut soqutinninnerat appariarsimasoq, Ittoqqortoormiini piniartut peqatigiiffianiit oqaatigineqarpoq.
Aviisi Sermitsiaq taama allappoq
Puisip amiinik tunisineq kisiat piniartut aningaasarsiutigaat, taamaattumillu umimmaat, puisit aarrillu neqaannik aalisakkanillu tunitsivimmik pilersitsisoqarnissaa kissaataannut ilaajuarsimavoq, tamannali tusaaniarneqartarsimanngitsoq, piniartut isumaqarput.
Taamaattumik Tasiilami piffissami 17. aamma 18. november Kommuneqarfik Sermersuup aaqqissugaanik Tunumi aalisarneq pillugu isumasioqatigiisitsisoqarnerani Ittoqqortoormiini piniartut peqataatinneqassannginnissaannik aalajangerneq annertuumik pakatsissutigineqarpoq. Ittoqqortoormiini aalisakkanut tunitsiveqannginera peqataatitsinnginnissamut tunngavilersuutigineqartoq, piniartut peqatigiiffianniit oqaatigineqarpoq.
Harald Bianco, Inuit Ataqatigiit, Kommuneqarfik Sermersuumi kommunalbestyrelsimi aamma Inatsisartuni ilaasortaq, Ittoqqortoormiuni piniartut aalisarneq pillugu isumasioqatigiinnissamut peqataatinneqannginnerat ajuusaarutigaa. Isumasioqatigiittoqarneranili Tunumi aalisartut piniartullu siammasissumik peqatigiiffiata Ittoqqortoormiini piniartut oqariartuutaat saqqummiunneqartut, tassuma qularutiginngilaa.
Kommuneqarfik Sermersuumi kommunalbestyrelsimi illuatungiliuttut, Siumut, aamma KNAPK-p Ittoqqortoormiiniik isumasioqatigiinnermut peqataatitsisoqassannginnera sakkortuumik isornartorsiorneqarpoq.
Aviisimi Sermitsiami atuarnerusinnaavutit. Aviisi uani pisiarisinnaavat.