Ivalo Egede KNR-imiikkunnaarpoq

KNR-ip pisortaanera qaammatini kingullerni annertuumik KNR-ip aningaasaqarnera pillugu politikkerinit isornartorsiorneqaraluttuinnarpoq.

Tamanna pissutaalluni Ivalo Egede atorfimminit ingerlaannartumik tunuarpoq.

- KNR-imi ukiut sisamat qaangiunnerini 2012-imi aningaasaqarnerup pitsaasumut saatsinnissaa iluatsippoq, taamaasillutalu amigartooruteqarunnaarluta. Tamanna KNR-ip oqaluttuarisaanerani pingaaruteqarpoq, tassungalu atatillugu suliap allamut ingerlateqqinnissaa toqqarpara namminerlu allanik misiliiniarlunga. Aaqqiissutissanik siumut siunnerfilinnik KNR-imullu naleqquttunik maanna nassaarniartoqarnissaanut suliniartoqarnissaa neriuutigeqaara. KNR sullissiviuvoq pingaarutilik, taamaattumillu pitsaanerpaanik sulinermi atugassaqartinneqartariaqarluni, aamma inuiaqatigiit kalaallit ineriartortinneqarneranni sullissiviup tamat oqartussaaqataanerannik kulturimillu paarsisutut pingaarutilimmik inissisimanerata ingerlaannarnissaa kissaatigaara, Ivalo Egede tusagassiutinut nalunaarummi nassuiaavoq.

KNR-ip pisortaanerata tullersortaa, TV-milu aallakaatitassiornermut pisortaa Jan Berg, KNR-ip pisortaanissaanik atorfinitsitsinissaata tungaanut KNR-imi pisortaaniugallassaaq.

KNR-ip 2012-imut ukiumoortumik naatsorsuutai siulersuisut tulliani ataatsimiinnissaannut marsimi pisussamut atatillugu avammut saqqummiunneqassapput.

Sermitsiaq.AG pisoq pillugu Ivalo Egede apersorusukkaluarpaa, Ivalo Egedeli pisumut annerusumik oqaaseqarusunngilaq.