Tunumi angallanneq
Justus Hansenip Tunumi sumiiffinni pingasuni timmisartuussisoqartalernissaa kissaatigaa
Nerlerit Inaannit, Kulusummit Reykjavikkimiillu timmisartuussisoqartalernissaa Demokraatinit Justus Hansenip kissaatigaa
Timmisartuussinermi kiffartuussinermut isumaqatigiissutissaq isumaqatigiinniutigineqaqqittussanngorpoq.
Kommuneqarfik Sermermuumi kommunalbestyrelsimut ilaasortap Demokraatineersup Justus Hansenip tamanna ima oqaaseqarfigaa:
- Qamannga pisumik illuatungeriit qinnuigerusuppakka kiisami Tumiuusugut eqqaamanialaaqqulluta. Qatsulluinnaqqissaarparput tunulliunneqartuarnerput.
- Tunumi timmisartuussineq sussaanngilaq. Tamatigorluinnangajak kinguaattoortoqartarpoq uniinnartoqanngippat. Eqaatsumillu sullissineq takussaanngingajappoq, Justus Hansen tusagassiutinut nalunaarummini ilaatigut oqarpoq.
Tunumut timmisartuussisarnerit pitsaanerusariaqartut oqaatigaa. Timmisartuussisarnerit inunnit suliffeqarfinniillu kajumigineqarneq ajortut oqaatigaa, tamannalu pitsaanerulersinniarlugu iliuuseqartoqarnissaa kissaatigalugu.
Timmisartuussisarnissat ima siunersuuteqarfigai
Timmisartuussinermi kiffartuussinermut isumaqatiginninniarnermi Justus Hansen siunersuuteqarpoq. Siunersuutaa nutaajunngilaq, siornatigullu itigartinneqartareerluni.
- Pivara timmisartuussineq sumiiffiit pingasut aqqusaarlugit, Nerlerit Inaat, Kulusuk aamma Reykjavik, Justus Hansen oqarpoq nangillunilu:
- Tassunga atatillugu timmisartuutileqatigiit soorlu Islandimeersut ammaffigisariaqarput Air Greenland kisiat ukkannagu. Neriuppunga siunnersuutiga pimoorullugu eqqartorneqarumaartoq, Tunumi innuttaasut ullumimut naleqqullugu pitsaanerusumik atugaqartitaanissartik pisariaqartimmassuk.