Juulli Nuummi politiinut eqqissisimanartoq
Juullip eqqissisimanarsimanera illoqarfiit pingaarnersaanni politiit nalunaarutigaat, tillinniarnerit marluk tillinnerillu sisamat nalunaarutigineqarsimallutik
- Juulli uatsinnut eqqissisimanakannersimavoq, tamannalu takussutissaavoq nuannersoq.
Taama Nuummi politiini pigaartoq Carl Sværd oqaluttuarpoq.
- Decembarip 23-aniit ullumikkut tillinniarnerit marluk tillinnerillu sisamat nalunaarutigineqarsimapput, tillinnerit ilaat marluk inuinnaat angerlarsimaffiini pisimallutik. Inunnut ataasiakkaanut tamanna soorunami nuanniippoq, kisianni pingaarnertut isigalugit annikitsuinnaallutik, Carl Sværd Sermitsiaq.AG-mut oqarpoq.
Ilaatigut iPhone 5 ataaseq biilillu matuersaataat tillinneqarsimapput.
- Tillinniarnerit tillinnerillu siornamut sanilliullugit amerlassusaat qanoq ippat?
- Tamanna imaaliallaannaq akisinnaanngilara, oqareernittulli juulli politiinut eqqissisimanakannersimavoq, Carl Sværd oqarpoq.
2012-imi Juulli tillinniarnerit eqqarsaatigissagaanni Danmarkimi najugaqartunut aamma erloqinarpallaarsimanngilaq.
Politiimmi juullip ulluata aappaani siornamut sanilliullugu ikinnerusunik nalunaarfigineqarsimapput.
Danmarkimi nuna tamakkerlugu politiit pingasunngornermi ullup-qeqqata siornatigut juullikkunni tillinniarnernik 749-nik nalunaarsuisimapput.