kalaalimineerniarfiit
Kalaalimineerniarfinnut nutaanut millionilikkuutaanik aningaasaliisut
Sisimiuni Nuummilu innuttaasut nutaanik kalaalimineerniarfittaalerput. Akiligassartaa 10 millioner koruunit sinnerujussuarpaat. Sisimiuni tamanna neqit mingutsinneqartartut mingutsinneqartarnissaannut annikillisaataasinnaassagunarpoq.
Kalaallit Nunaanni illoqarfinni anginerni marlunni kalaalimineerniarfiit allanngortiterneqarujussuartussanngorput.
Suliariumannittussarsiorneq naammasseqqammersoq
Ukiumi nutaani Sisimiuni tunitsivissamik nutaamik immikkoortumik siullermik sananissamut 5 milloner koruunit immikkoortinneqarput Nuummilu Nuutoqqami Kalaaliaratoqannguup allanngortiterneqarnissaanut nutarterneqarnissaanullu sapaatip akunnerata siuliani suliariumannittussaarsiuussisoqarpoq.
- Suliassamut ataaseq neqeroruteqarpoq tamannalu entreprenørillu sukumiisunerusumik isumaqatiginninniutigisussanngorparput. Isumaqatigiissutit tamarmik inisseriarpata ”Kalaaliaqqap” tunineqarnissaanut suliat aallarnisaataasut aallartinneqassasut ingerlatsinermut pisortaq, Frank Rasmussen, Kommuneqarfik Sermersooq, oqarpoq.
- Qanoq akeqassava?
- Kalaaliaraq tuniniarlugu neqeroorutigineqassaaq, taamaattumik akia oqaatigisinnaanngilara. Akikinnerpaaffeqartitsivugulli, Frank Rasmussen, qanoq amerlatiginerannik oqarumanngitsoq akivoq.
Pakatsissutigineqanngitsoq
- Ataasiinnaq neqerooruteqarmat pakatsissutigaasiuk?
- Naamik, naatsorsuutigineqartut pisoqarpoq, Frank Rasmussen akivoq.
Ukiuit ingerlaneranni Nuup qeqqani Brugsenip eqqaani kalaalimineerniarfik Kommuneqarfik Sermnersuumut amigaartoorutaarujussuartarsimavoq. 2010-mi ammarmalli ukiumut 2 aamma 3 millioner koruuninik amigaartoorfiusarpoq. Tunisinernit isertitat sulisunut ingerlatsinernullu aningaasartuutinut allanut malinnaasinnaasimanngillat.
Nutarterineq
Kommunalbestyrelse naapertorlugu kalaaliaratoq isateriarlugu nutarterneqarsinnaavoq nutaatut isikkoqalersillugu aningaasatigullu ingerlatsineq isumannaannerulersillugu.
Allaaserisaq tamaat AG-mi saqqummertumi kingullermi atuaruk, taanna uani linki atorlugu digitalitut pisiarisinnaavat: