demokrati
Kalaallit atuartut Folketingip oqaluttarfia tiguarpaat
Kimmernaq Steenholdt aamma Mikael Petersen Niaqornaarsunneersut Ungdomparlamentimi Kalaallit Nunaat sinnerlugu peqataapput
Folketingimi ataasinngorneq Ungdomsparlamentip ulloraa.
Meeqqat atuarfianni atuartut 179-t, folketingimi ilaasortat 179-iusut amerlaqataat, taakkunannga Nunatsinnit toqqakkat marluk, ullumikkut ullormi ataatsimi politikeriupput.
Niaqornaarsuk
Taakku marluk Niaqornaarsummi Atuarfik Kristian Lundbladimi 9. klassemi atuartuupput, Kimmernaq Steenholdtip aamma Mikael Petersenip Folketingip oqalugiartarfiani oqalugiaqqaarnissartik eqqissillutik atorpaat.
Taakku marluullutik Danmarkip nalunaaqutaa malillugu ulloqeqqareernerani oqaluttarfimmut qaqissapput, Danmarkimi aamma Kalaallit Nunaanni qimaasut pillugit politikkimut folketingimi aalajangiussassatut siunnersuuteqassallutik,
Oqaaseqartartut
Atuartut politikeritut sulineq piviusorsiorpalaartumik ataatsimiititaliami sulineq, oqaaseqaammik oqalugiarneq, taasineq aamma ministerinut tallimanut apeqqarissaarneq, aammalu arfernattut ministeriunermik apeqqarissaarneq misilissavaat.
Pissanganartoq
- Peqataasut allat naapinnissaat, aammalu siunnersuutitsinnut qanoq isumaqassanersut pissanganarpoq. Kalaallit Nunaannit aamma Savalimmiunit peqataasut amerlanerunissaat neriuutigigaluarpara, Mikaelilu marluinnaalluta taakkunannga nunaneersuni peqataasugut paasigatsigu tupaallappunga. Neriuppunga Ungdomsparlamentimit ilikkagarpassuaqassasugut, aammalu inernera atuarfitsinni atuartunut allanut saqqummiunnissaa qilanaaraara, Kimmernaq Steenholdt oqarpoq.
Taassuma atuaqataa aammalu ullormi ataatsimi politikereqataa, Mikael nangilluni oqarpoq:
- Uagut siunnersuuterput toqqarneqarsimammat, aammalu Folketingip ungdomsparlamentiani peqataasinnaanerput tupaallaatigaara. Ilanngutsitsinermut ataatsimiititaliamiittut allat naapinnissaat, aammalu siunnersuutitta oqalugiartarfimmi saqqummiunnissaa pissanganartinnerpaavara.
TV takuuk
Ungdomsparlamentip ullua www.UP16.dk aqqutigalugu malinnaavigineqarsinnaavoq, ilaatigullu aalajangiinissamut siunnersuutigineqartut 60-t toqqakkat takuneqarsinnaapput. Ullumikkut aamma toqqaannartumik tamanna TV-ikkut malinnaavigineqarsinnaavoq.