Kalaallit Islandimiissimasut nunatsinnukarput
Kalaallit arfineq-pingasut Islandimiittut Kalaallit Nunaata Reykjavikkimi sinniisoqarfianut sapaatip akunnerata naanerani nsaaffiginnipput. Tamarmik maanna angerlamut tikereersimanngikkuni nunatsinnukarlutik angalapput.
Kalaallit arfineq-pingasut Kalaallit Nunaata Reykjavikkimi sinniisoqarfiannut saaffiginnissimapput, sinniisoqarfiup kalaallit Islandimi sulinngiffeqarlutik angalasut imaluunniit aallarneq ajuleqqasut saaffiginneqqullugit ujartoreeraalu.
- Innuttaasut attaveqarfigisimasagut pillugit oqaannarsinnaavunga aallaqqusaajunnaartoqanngimmat – innuttaasullu attaveqarfigisagut Kalaallit Nunaannut tikeriinngikkunik maanna Kalaallit Nunaannukarlutik angalapput, sinniisoqarfimmi pisortaq, Jacob Isbosethsen Sermitsiaq.AG-mut oqarpoq.
Taassuma ilisimatitsissutigaa angalasut arfininngornerup sapaatillu ingerlaneranni saaffiginnissimasut, namminneerlutillu angalanissartik ajornartorsiutitaqanngitsumik isumagisimagaat.
Inuk coronavirusimik tunillatsissimasoq siulleq Kalaallit Nunaanniittoq ataasinngornermi paasineqarpoq.
Ministeriunerup Mette Frederiksen danskisut innuttaassusillit, taamatullu aamma kalaallit, nunanit allanit piaarnerpaamik angerlaqullugit tallimanngormat siunnersorpai.
Danmarkilli killeqarfini arfininngornermi matummagit, Keflavikkimiit Kalaallit Nunaannut Air Greenlandip timmisartuussinissaa taamaatiinnarneqarpoq.
- Kalaallit maanngaanniit aallarneq ajulersimappat siunnersorlugillu paasissutissanik tunisinnaavugut, angalatitsivinnillu attaveqarnissaat innersuussutigalugu. Kikkut tamat oqartussat innersuussutaannik malinneqqullugit kaammattorpagut. Maannamut siunnersuisariaqalersimanngilagut suli, innuttaasulli pisumi matumani immikkuullarilluinnartumi, saaffissaqarnertik nuannarigaat malunnarpoq, Jacob Isbosethsen oqarpoq.