Kalaallit Nunaanni isumalluutatorneqanngitsoq
Qaqqat iluinili timersortarfiliortoqartarlunilu tankeqarfiliortoqartarsinnaavoq. Norgemiut misilittagaat pitsaasut Kalaallit Nunaanni atorneqarsinnaapput, Trondheimimi ujarassiornermik qaartiterinermillu ilisimatooq oqarpoq.
Norgemiut qaqqat iluini uuliamik imermillu toqqorsiviliortarput. Taamatullu aamma qaqqat iluini timersortarfiliortarlutik. Tamakkulu aserfallajaallisaanermut aningaasartuuteqarfiunngingajattumik ukiorpassuarni atorneqarsinnaapput.
– Kalaallit Nunaanni qaqqat Norgemilu qaqqat imminnut eqqaanartorujussuupput. Taamaattumillu norgemiut misilittagaat aamma Kalaallit Nunaanni atorneqarsinnaapput, ujarassiornermik qaartiterinermillu ilisimatooq Einar Brock Trondheimimi universitetimi NTNU-mi atorfilik Sermitsiaq Inuussutinut oqarpoq.
Norgemiut sullorsuliullaqqissuullutillu nunap iluatigut atortulersuillaqqissuupput.
Norgemi 750-inik qimuttuitsunut sullorsuaqarlunilu 1.000-inik aqqusineqarpoq. Norgemilu aamma 200-nik nunap iluaniittunik erngup nukinga atorlugu nukissiuuteqarpoq.
– Kalaallit Nunaanni suli isumalluutit nunap iluaniittut atorneqanngillat, Einar Broch aamma civilingeniør Jan Anton Rygh, qaqqat iluini sanaartornermik ilisimatuujusoq oqarput.
Norgemiut ilisimatuut norgemiut qaqqani sanaartornermik misilittagaat oqalugiaatigiartorlugit Sisimiuneeqqammerput.
Norskit qaqqap iluani sanaartornerannit assersuutit uani takusinnaavatit.