namminersorneq
Kalaallit Nunaannit isumaginninnerup tiguneqarnissaa Folketingimi amerlanerussuteqartut itigartippaat
Namminersornermut inatsit ataqqineqassaaq, Kalaallit Nunaat meeqqanik inuussuttunillu isumaginninnermi ajornartorsiutilerujussuugaluartoq.Taamatut naqissusiipput Folketingimi amerlanerussuteqartut
Kalaallit Nunaanni isumaginninnerup Danmarkimit tiguneqarnissaanik Dansk Folkepartip siunnersuutaa Folketingimi itigartitsissutigineqarpoq. Taamatut paasissutissiivoq KNR.
Namminersornermut inatsit
– Naalakkersuisut Namminersorlutillu Oqartussat isumaginninnikkut suleqatigiinnerat namminersornermut inatsisip iluani pissaaq, tunngavigalugulu isumaginninnermik oqartussaaffiup Kalaallit Nunaannit tiguneqarsimanera, KNR naapertorlugu ministeri oqallinnermi oqarpoq.
Meeqqat illersuisuat
Dansk Folkeparti taamatut siunnersuuteqarpoq, meeqqat illersuisuata Aviâja Egede Lyngep 2015-imi ukiakkut Qaasuitsup Kommuniani meeqqat inuusuttullu amerlasuut atugarisaat sakkortuumik isornartorsioreeraalu.
Dansk Folkepartillu siunnersuutigaa qallunaanik angalaqatigiinnik pilersitsinissaq, isumaginninnermik sumiginnaasoqartillugu ikiorsiisartussanik, tamatumani ilanngullugu meeqqanik inuusuttunillu persuttaasarnerup kinguaassiuutitigullu atornerluisarnerup pitsaaliorneqarnissaat.
Sulianik suliarinninneq
Isumaginninnikkulli Danmark ikiorsiiniarpoq.
Naalakkersuisut Namminersorlutik Oqartussanut neqeroorutigaat periutsinik ikiorsiinissaq, periutsit tamakkua kommunini sulianik suliarinninnermi sulianillu nakkutilliinermi atornqarsinnaallutik. Taamatullu ikiuiniarneq Namminersorlutik Oqartussat qujarussimagaat KNR paasissutissiivoq.