akileraarnermik aqutsisoqarfik
Kalaallit Nunaat EU-mit nakkutigisaajunnaarpoq
Kalaallit Nunaat nunatut peqquserluffiusutut nalunaarsoqqajunnaarluni nunatut peqquserluffiusinnaasutut nalunaarsorsimagallartoq Namminersorlutik Oqartussat ilisimatitsivoq
Kalaallit Nunaat nunatut akileraanngitsoorfiusinnaasutut nakkutigisassatut 2017-ip aallartinnerani nalunaarsorsimalerpoq.
Nunat akileraanngitsoorfiusinnaasut tassaagajuttarput akileraarutikitsut akileraartarnerlu pillugu inatsisit iluanaarnartuusarlutik, kiisalu paasissutissanik paarlaateqatigiinnissamut killilimmik periarfissaqartarput imaluunniit periarfissaqarneq ajorlutik.
- Nunat peqquserluffiusinnaasutut nalunaarsukkat 17-init amerlanerusut ulloq 5. december 2017 EU-kommissionimi Aningaasaqarnermut Aningaasarsiornermilu Siunnersuisoqatigiinnit saqqummiunneqarput. Akileraartarnermut Aqutsisoqarfiup 2017-ip ingerlanerani suliniuteqarnera pissutaalluni Kalaallit Nunaat nalunaarsorsimanngilaq. Kalaallit Nunaat nunatut peqquserluffiusutut nalunaarsoqqajunnaarluni nunatut peqquserluffiusinnaasutut nalunaarsorsimagallarpoq, Namminersorlutik Oqartussat tusagassiutinut nalunaarummi allappoq.
Maleruaqqusat malinneqarput
Kalaallit Nunaat Global Forumimut ilaasortanngorsinnaaniassammat Akileraartarnermut Aqutsisoqarfik 2017-ip qiteqqunnerani suliniuteqarnikuuvoq.
- Taassuma saniatigut september 2018-imi Akileraartarnermut Aqutsisoqarfiup akileraarutit pillugit paasissutissanik siullernik paarlaasseqatigiinnissaminut imminut pisussaatippoq. Naggasiutigalugu Kalaallit Nunaat ”Inclusive Framework on BEPS”-imut ilanngunnissaa naatsorsuutigineqarpoq kiisalu nunani tamalaani pisussaaffinnik malitsigitinneqartunik naammassinnissinnaassalluni, tusagassiutinut nalunaarummi ilisimatitsissutigineqarpoq.
Immikkut nakkutiginninneq
Akileraartarnermut tunngasunik nunani tamalaani suleqatigiinnermut peqataaneq nuannaarutigalugu kiisalu nunat 100-t sinnerlugit peqataasut suleqatiginissaannut qilanaarluni Aqutsisoqarfimmi pisortaq Kim Neumann Nielsen oqarpoq.
- Nunami namminermi akileraartarnermut tunngasut nunanit suleqatigisartakkanit kukkunersiorneqartarnissaannut Kalaallit Nunaat piareersimasinnaaqqullugu ukiuni makkunani nunani tamalaani akileraartarnermut tunngasut immikkut Akileraartarnermut Aqutsisoqarfimmit nakkutigineqassapput, Aqutsisoqarfimmi pisortaq oqarpoq.
Kalaallit Nunaata inatsimmik pisariaqartinneqartumik 2018-ip naannginnerani atortuulersitsinissaa aammalu Kalaallit Nunaata nunatut peqquserluffiusinnaasutut nalunaarsoqqajunnaarnissaa anguniarlugu suleriaatsinik atuutsitsilersimanissaa Akileraartarnermut Aqutsisoqarfimmit naatsorsuutigineqarpoq.