Kalaallit palasiat atorunnaassasorivoq
Jens Kristian Kleist allagarsisimavoq atorfini 2011-miit atorunnaarsinneqassasoq.
![Kalaallit palasiat atorunnaassasorivoq](https://image.sermitsiaq.ag/236727.webp?imageId=236727&width=960&height=542&format=jpg)
Naak Naalakkersuisut siulittaasuat Kuupik Kleist qulakkeerinnikkaluartoq Danmarkimi kalaallit palasiattut atorfik 2011-mi atorunnaarsinneqassanngitsoq, palasi Jens Kristian Kleist allakkatigut ilisimatinneqaqqammerpoq atorfini atorunnaarsinneqassasoq.
Taamaakkaluartorli Jens Kristian Kleistip aamma Kuupik Kleistip qulakkeerinnissutaa allagangorlugu tigummivaa.
Jens Kristian Kleistip qatsuilluinnarpaa Naalakkersuisut tungaanniit assigiinngitsuniik nalunaaruteqaqattaarneq.
- Suna upperissanerpara, palasi aperivoq.
Danmarkimi palasitut atorfik ukiut kingulliit qullit ingerlanerini atorunnaarsinniarneqartaraluarpoq, mannali tikillugu iluatsinngitsumik.
Kalaallit peqatigiiffiisa kattuffiata Inuit siulittaasuat Bitha Metelmann novembarimi akerliulluni allagaqarpoq, taamani nalunaarutigineqarmat kalaallit palasiatut atorfik atorunnaarsinneqassasoq.