Kalaallit qimmiat akusaanngitsoq qanoq ittuua?
Qimmit sannaanni kingornuttakkat pillugit paasissutissat ullumikkut amerlagisassaanngimmata, kalaallit qimmiat qimuttoq qimminit allanit akuneqarsimanngitsoq qanoq ittuunersoq taajuminaattuusoq, Aalisarnermut, Piniarnermut Nunalerinermullu Naalakkersuisoq ilisimatitsivoq.
Kalaallit qimmii qimuttut sorliit “kalaalivittut” taaneqarsinnaanersut qularnarpoq. Tassunga pissutaavoq qimmit suussusaannut assigisaanullu ullumikkut aalajangersimasumik malitassaqanngimmat.
Qeqertarsuarmi qimmit ilaat qimminik allanik akusaasimasinnaaneratnut pasisaqartoqarneranut tunngatillugu Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO) qimmit DNA-vanik misissugassanik tigusivoq Danmarkimullu misissuisarfimmut nassiussilluni.
Ilisimatusaatigalugu sulineq
- Misissuineq ilisimatusaatigalugu sulinermut atatillugu suliarineqarmat, misissuinerup inernerisa naammassineqarnissaannut piffissaq sivisunerulaassaaq. Ilisimatusaatigalugu sulinermut ilaatinneqarmata suliaq sivisunerusumik suliarineqarpoq, naalakkersuisoqarfik ilisimatitsivoq.
- Kalaallit Nunaanni kalaallit qimmii isikkumikkut assigiinngisitaartorujussuupput. Soorlu qimmit timaasa sannaat, angissusaat, meqquisa takissusaat meqquisalu qalipaataat assigiinngitsuupput. DNA-nik misissuinissamut periarfissaqalermat UNIO DNA-nik misiliutitut misissugassanik tigusivoq. Taamaasiornermi paasiniarneqassaaq qimmip isikkua aallaaviginagu, kisiannili qimmip DNA-mini sananeqaataa aallaavigalugu kalaallit qimmivigineraat aalajangerneqartarsinnaanersoq, naalakkersuisoqarfik ilisimatitsivoq.
Naliliineq naammattoq utaqqineqarpoq
- Aalisarnermut, Piniarnermut Nunalerinermullu Naalakkersuisoq naliliivoq qimmit pinngoqqaatigalugu sananeqaataatigut paasisat naammattut suli pigineqanngitsut, taamaattumillu qimmit akusaanerannik pasitsaassaqarnermi qimmit sorliit “kalaalivittut” taaneqarsinnaanersut pillugit naammattumik naliliisoqarsinnaanngikkallartoq.
Qeqertarsuarmi qimmit marluk akusaasutut pasineqartut (arnaviaq taassumallu piaraa ataaseq) piginnittup kommunimut piumasaqarnera aallaavigalugu 2018-imi toqunneqareersimasut. Taamaattumillu qimmit taakku Qeqertarsuarmi qimminut allanut sananeqaatsinik allaanerusunik akusinissaminnut aarlerinartortitsiunnaareersut.
Qimmit toqunneqartarnissaat innersuussutiginngilaa
Qimmiaqqat tulleriaarlugit toqorarneqarsimaneranut ilisimasaqarneragaaneq eqqunngitsuusoq aamma uppernarsarpaa, tamannalu aamma innersuussutaasimanngitsoq ilisimatitsissutigalugu.