kalerrisaarut
Kalerrisaarut nutaaq: Qutsissumukaritsi
Nuna sisooqqilerunarpoq. Tamanna pissutigalugu nunaqarfimmi Illorsuarni innuttaasut sissamiit qimaguteqquneqarput. Nunaqarfik Illorsuit politiinit qimagutsinniarneqarpoq.
Upalungaarsimanissamik nalunaarut aatsaarluinnaq politiinit nassiunneqarpoq, taakku tugassiuuteqarfii qinnuigaat ima nalunaaruteqaqqullugit:
Alarmen ordret
Uummannap sulluani nunaqarfimmilu Illorsuarni innuttaasut pinasuartumik qutsissumukaqquneqarput immamullu qanillanaveersaaqquneqarlutik. Illorsuarni inuttaasut qimarngunneqarnissaat politiinit sulissutigineqarpoq.
Paasissutissat nutaat aallaavigalugit politiit ilimagaat ippassaq nunap sisoorfigineqartup kangiatungaani nunamik sisoortoqaqqilertoq.
Politiit eqqissisimatinneqarnissaminnik qinnuteqarput, upalungaarsimanermik nalunaarummi allassimasoqarpoq.
Annaassiniartartut ulapputtut
Annaassiniartartorpassuit Uummannap eqqaaniittut nunaqarfiup innuttaasuinik Uummannap illoqarfianut qimarngussuissallutik unnuarmanna ulapputtussanngorput. Nunaqarfik Illorsuit Nuugaatsiamit innuttaasukinneruvoq, taamaammat qimarngussineq sukkanerusumik ingerlanneqarsinnaanera ilimanarsinnaavoq.
Qulimiguullit sisamat
Sapaatip ingerlanerani qulimiguullit sisamat nunaqarfimmit Nuugaatsiamit innuttaasunik qimarngussitinneqarput. Qulimiguullit pingasut Air Greenlandimi Issittumilu Sakkutooqarfimmit qulimiguulik ataaseq qimarngussuinermi atorneqarput.
Paasissutissat suminngaanniit pissarsiarineqarsimaneri politiinit paasissutissiarineqanngilaq.