Kangerlussuaq: Coronamik tunillatsisimasorisat marluk mattunneqartut
Københavnimiit Kangerlussuarmut timmisartumik ilaasut marluk mattunneqarsimapput. Ilaasut allat immikkut tunillaassuinissamut "ulorianaateqarluinnartutut" maannamut uninngatikkallarneqarput.
Nappaalanersuaqarneranut Ataatsimiititaliaq naliliisimavoq, timmisartumut Kangerlussuarmut tikittumut ilaasut marluk coronavirusimik tunillatsisimasinnaasut. Taamaammat pisumut atatillugu pisortat pisariaqartinneqartumik isumannaallisaallutik aallartissimapput, Nappaalanersuaqarneranut Ataatsimiititaliaq tusagassiorfinnut nalunaaruteqarnermi ilisimatisivoq.
Ilaasut marluk maannammut mattunneqarallarput, coronavirusimik tunillatsisimanissaat pasitsaanneqarmat. Peqqinnissaqarfimmi sulisunit taakku nakkutigineqarput. Atsaat ullup ataatsip missaa qaangiuppat, taakku tunillatsisimanersut paasinarsissaaq.
Timmisartumi ilaasut allat marlunngorlugit avinneqarsimapput. Tunillaassuinissamut “ulorianaateqarluinnartut” tunillaassuinissamullu “ulorianaateqarpallaanngitsut”.
Ilaasut tunillaassuinissamut “ulorianaateqarluinnartut” timmisartoqarfimmiiginnartinneqarallassapput inerlaqqeqqusaanatillu. Ilaasut tunillaassuinissamut “ulorianaateqarpallaanngitsut” apuuffissaminnut ingerlaqqissinnaapput.
- Suleqatikka politiillu peqatigalugit Kangerlussuarmukarpunga, ilaasut tunillaassuinissamut “ulorianaateqarluinnartut” suneqassanersut inaarutaasumik isummeriartorluta, Nunatta Nakorsaanera Henrik L. Hansen Sermitsiaq:AG-mut ilisimatitsivoq.
Tunillaassuinissamut “ulorianaateqarluinnartut” oqartussat inaarutaasumik aalajangeereerpata ullumi kingusinnerusukkut apuuffissaminnut ingerlaqqissinnaassapput, tamarmilli immikkut ulluni 14-ini angerlarsimaffimminni mattussaaqqangallassapput, qanoq innerminnik maluginiagaqaqquneqarlutik.
Oqartussanittaaq eqqumaffigeqquneqarpoq, nappaatip ersiutigisartagaanik immikkut maluginiagaqartoqassasoq.
- Coronaviruseqartumit tunillatsissimagaanni, siusinnerpaamik ullut marluk qaangiunneranni nammineerluni tunillaassuisoqalersinnaavoq. Nunatta Nakorsaanera Henrik L. Hansen nassuiaavoq.
Tunillaassuinissamut ”ulorianaateqarpallaanngitsut” angalanertik ingerlatiinnarsinnaavaat, nappaatilli ersiutigisartagaanik nakkutiginninnissamut ilitsersorneqarlutik.
Coronavirusip (2019-nCov) nalinginnaasumik ersiutigisarpai kissarneqarneq, quersorneq, issannguneq, niaqorlunneq nukitsigullu annerisaqarneq.