Kangerlussuaq: Timmisartumik tikittut toqqissisimatitsinngillat
Københavnimiit angalasut innuttaasunut akuliuttarneri pillugit, Kangerlussuarmi innuttaasut toqqissisimanngillat.
Imarpik qulaallugu timmisartorlutik nunatsinnut tikittunut malittarisassat sukaterneqartariaqarput. Kangerlussuarmi nunaqarfimmi aqutsisut taama isumaqarput. Covid-19-imik tunillaassortoqaleratarsinnaanera taakku ernummatigaat.
Københavnimiit timmisartoq tikittussanngoraangat timmisartoqarfik Kangerlussuarmi najugaqartunut angalasussaanngitsunut matuneqarallartarpoq. Taama iliortoqartarpoq tikittoqassatillugu akunneq ataaseq sioqqullugu, covid-19-imik tunillaassortoqaratarsinnaanera pinngitsoortinniarlugu.
- Nakkutigineqartarpoq angalasuunngitsunik isertoqannginnissaa, tassani pineqarluni angalasut akulerutsinnaveersaarneqassammata. Tamanna eqqarsaatigalugu innuttaasunik illersuineruvoq kusanartoq, Kangerlussuarmi nunaqarfinni aqutsisuni ilaasortaq, Johan Lange tusagassiorfinnut nalunaaruteqarluni allappoq.
Kangerlussuarmulli tikittut Pilersuisumi pisiniarfinnilu minnerusuni pisiniartarput, taamaasillutik nunaqarfimmi najugaqartut akuleruffigisarlugit. Tamannalu ernumatitsilerpoq:
- Covid-19 pissutaalluni oqartussaniit taama aaqqiisoqarsimanera equngavallaartoq akuersaarneqarsinnaanngitsorlu isumaqarpunga. Pissutigalugu imarpik qulaallugu angalasut ingerlaqqinnissap tungaanut qanorluunniit pisinnaapput, tassa ingerlaqqinnissaq utaqqillugu anisinnaapput sumukarsinnaallutilluunniit, Johan Lange nassuiaavoq.
Sukaterisoqarli
Kangerlussuarmi innuttaasut toqqissisimanngillat nunap iluanit nunanit allaniillu tikittut najugaqartunut akuleruteriaannaanerat pillugu. Nunaqarfimmi najugaqartut angalasullu immikkoortilluinnarnissaat anguniarlugu avissaartitsisoqartariaqartoq taakku isumaqarput.
- Siunnersuutigaara tuniluuttoqarnissaa pinaveersaartinniarlugu isumalimmik iluatsittumillu sulinikkut imarpik qulaallugu angalasut Kangerlus-suarmi illorsuarmiik aamma aneqqusaajunnaartinneqassasut. Taamaassinnaanngippat innuttaasunut iseqqusaannginneq isumaqanngilaq. Akerliuniaannarnertut isumaqanngilaq malitareqqusalliukua equngavallaarneri aaqqiivigineqartariaqartut, Johan Lange oqarpoq erseqqissarlugulu maanna najugaqavissut timmisartoqarfimmut iseqqusaajunnaartarallarneri ajorinagu.
- Oqartussaniit malittarisassat isumaliutigineqaqqittariaqartut kissaatiginarpoq, suli nunatta inuinik covid-19 eqqarsaatigalugu illersuineq pissappat, naggasiivoq.
Sermitsiaq.AG-p Kangerlussuarmi angalasunut sukaterisoqarnerunissaanik eqqartuisoqassanersoq pillugu corona sekretariatimi attaveqatigiinnermik suliaqartut attavigai, sulili akissutisinani.