Angallanneq
Kiffartuussinissamut isumaqatigiissutit isumaqatigiissutaareersut atorunnaarsinneqarsinnaanngillat
Inatsisartuni Ilaasortaq Ane Hansen (IA) angallannermi kiffartuussinissamut isumaqatigiissummut apeqquteqarpoq. Kiffartuussinissamut isumaqatigiissutit isumaqatigiissutaareersut atorunnaarsinneqarsinnaanngillat, Naalakkersuisuungallartoq paasissutissiivoq
Kiffartuussinissamut isumaqatigiissut januarip aallaqqaataani naammassineqarmat angallatitseqatigiiffik Disko Line isornartorsiorneqangaatsiarpoq. Nunatta kujataaneersut Qeqertarsuullu tunuaneersut nipaassimanngillat.
Inatsisartuni Ilaasortaq Ane Hansen (IA) angallannermi kiffartuussinissamut isumaqatigiissut sammineqangaatsiartoq apeqquteqaateqarfigaa.
Atuaruk: Isorinnittup kiffartuussinissamut isumaqatigiissutit akisussaaffigilera
Taamaatinneqarsinnaanngillat
Politikkerit IA-meersut ilaatigut kiffartuussinissamut isumaqatigiissutit atorunnaarsinneqarsinnaanera apeqqutigaa.
Muté Bourup Egede (IA) Attaveqaqatigiinnermut Naalakkersuisuungallartoq akissuteqaammini eqqaavaa kiffartuussinissamut isumaqatigiissutit isumaqatigiissutaareersut atorunnaarsinneqarsinnaanngimmata.
- Tamatumani isumaqatigiissutit illuatungeriinnit atorunnaarsinneqarsinnaanngitsut pineqarput. Muté Bourup Egede Ane Hansenimut taama akissuteqarpoq.
Atuaruk: Angallanneq pillugu Qeqertarsuarmi ataatsimiitoqassaaq
Sumiginnaaneq
Illuatungeriit arlaata isumaqatigiissut sumiginnarpagu, illuatungiliuttup sumiginnaanngitsup illuatungiliuttoq sumiginnaasoq allakkatigut nalunaarfigissavaa, illuatungiliuttoq isumaqatigiissummik annertuumik sumiginnaasutut isigineqartoq, aammalu sumiginnaaneq ullut 30-t qaangiutsinnagit iluarsineqassasoq. Naalakkersuisuungallartoq taama paasissutissiivoq.
- Sumiginnaaneq ullunik 30-inik piffissaliineq qaangiutsinnagu iluarsineqanngippat, illuatungiliuttoq sumiginnaanngitsoq isumaqatigiissummik erniinnaartumik atorunnaarsitsinissamik pisinnaatitaaffeqarpoq Múte Bourup Egede taama oqarpoq.
Atuaruk: Disko Line nalilersorpaat
Isumaqatigiissutilli atorunnaarsinneqarsinnaanerat pillugu ima allappoq:
Sullissisoq akuersissutinik, oqartussaasunit akuersissutinik, sillimmasiissutinik il.il. arsaarneqassaaq, annaasaqassaaq imaluunniit nutarteriffigineqassanngilaq, imaluunniit inatsisinik atuuttunik malinninngippat.
Sullissisup angallannermi suliassamik isumaginninnermini inatsisit sukkulluunniit atuuttut malinngippagit isumannaallisaanermilu illersorneqarsinnaasumik ingerlatsinngippat.
Sullissisup isumaqatigiissummi naatsorsuutigineqartutut paasissutissanik tamanik Namminersorlutik Oqartussanut nalunaaruteqanngippat.
Sullissisoq suliffeqarfittut ingerlassinera ilusilersoqqinneqaqqippat imaluunniit akiliisinnaajunnaartutut nalunaarutigineqarpat.
Namminersorlutik Oqartussat tunngavissaqanngitsumik akiliinngitsoorpata