aatsitassat
Kim Kielsen: Nunamineralsimik naakkittaatsumik tigusiniartoqanngilaq
Naalakkersuisut siulittaasuata Siumumeersup Kim Kielsenip ilisimatitsitsissutigaa Namminersorlutik Oqartussat Nunaminerals naakkitsaatsumik tiguniarlugu pilersaaruteqanngitsut
Sermitsiaq.AG-p nittartakkamini uani sapaatiummat oqaluttuaraa Namminersorlutik Oqartussat Nunamineralsimut naakkitsaatsumik tigusinissaminnut pilersaaruteqartut, ilaatigut Namminersorlutik Oqartussat qallunaallu annertuumik aningaasaliisimasut marluk, kiisalu piginneqatigiinnissutinik pigisaqartut 3.000-it, amerlanerit nunatsinni najugaqartut, piginneqatiginnissutiminnik annaasaqarfigisassaannik.
Naalakkersuisut siulittaasuat Siumumeersoq Kim Kielsen ilisimatitsivoq tamanna ilumuunngitsoq.
- Namminersorlutik Oqartussat Nunamineralsimik maanna oqaloqateqarneranut siunertaavoq, selskabip suliaasa ukiuni tulliuttuni ingerlanneqarnissaannut imminut akilersinnaasumik tunngaviliisoqarsinnaanersoq misissussallugu.
Kim Kielsen tusagassiuutinut nalunaaruteqarluni taama allappoq.
Atuaruk: Namminersorlutik Oqartussat Nunaminerals naakkittaatsumik tiguniarpaat
Nunamineralsip annaanniarneranut alloriarnertut siullertut 4,5 million koruuninik Namminersorlutik Oqartussat nunatta karsianit atukkiillutik aningaasaliisimasut Namminersorlutik Oqartussat allapput.
- Imminut akilersinnaasumik ilusilersueqqinnissamik pilersaarusiornermi selskabip ingerlaqqinnissaanut nammineerluni aningaasaateqannginnera ilanngullugu eqqarsaatigineqartussaavoq. Selskabimut namminersortut piginneqataasullu aningaasaliinerutinnissaannut periarfissaqarsimanngilaq, Nunamineralsillu ukiuni tulliuttuni aningaasarsiulersinnaanera ilimanaateqarani, Namminersorlutik Oqartussat allapput.
- Tamanna tunngavigalugu Nunaminerals piumaffigaarput selskabip nalinga arlaannut attuumassuteqanngitsumut nalilerteqqullugu. Aatsitassarsiorluni suliniutit nalingi ilumoortut aatsaat ilisimagaanni ingerlatsinissamut piviusorsiortumik pilersaarusiortoqarsinnaavoq selskabip ukiuni tulliuttuni ingerlannissaanut akileraartartut akiligaannik aningaasaliinissamut tunngaviusinnaasumik, Kim Kielsen oqarpoq, nangillunilu:
- Soorlu oqaatigereeriga Nunamineralsimik naakkittaatsumik tigusinianngilagut, aamma Namminersorlutik Oqartussat ilusilersueqqinnermi aningaasaliisartunik namminersortunik suleqateqarusuppoq. Aappaatigulli aamma uppertikkuminartuunngilagut, akileraartartullu Nunamineralsip ilusilersoqqinnissaanut akiliissappata tamanna piviusorsiortumik naatsorsoqqissaakkamillu tunngaveqarluni pissaaq.