Kim Kielsen nutaamik naalakkersuisoqarfimmi pisortartaalerpoq
Nalaakkersuisut Siulittaasoqarfiani pisortatut atorfik, taamatullu Kim Kielsenimut qaninnerpaasutut siunnersuisussatut sunniuteqarluartutut atorfik, nutaamik inuttaqartussanngorpoq.
Svend Hardenbergip 2015-imi pisortaajunnaarnerata kingorna Søren Hald Møller Naalakkersuisut Siulittaasoqarfiani pisortagallartutut atorfeqareerluni 2015-imi juunimi pisortatut toqqarneqarpoq.
Søren Hald Møllerip ukiuni aalajangersimasuni atorfeqartitaanera upernaaq manna qaangiutissaaq, naalakkersuisoqarfimmilu pisortassarsiornermik qinnuteqarfissaq februaarimili saqqummerneqarsimalluni.
Sermitsiaq.AG-p paasivaa Søren Hald Møller toqqarneqarani allamik taarserneqartussanngortoq.
Naalakkersuisut kingullermik ataatsimiikkamik taama aalajangerput, naatsorsuutigineqarporlu Kim Kielsenip naalakkersuisoqarfimmi pisortap kinaanera piffissami qaninnermi avammut saqqummiutissagaa.
Søren Hald Møllerip atorfimminiiginnarnissaminut piffissamik sivitsuinissamut qinnuteqassanerluni februaari qaammat oqarumasimanngilaq.
Atorfilittaq misilittagaqarluartoq
Søren Hald Møller 1986-imili Kalaallit Nunaanni najugaqarlunilu sulisimavoq. Pisortaqarfinni atorfeqarnermik misilittagaqarluartuuvoq, namminersornerullutik oqartussani kingornalu namminersorlutik oqartussani pisortatut ukiuni arlalinni atorfeqartarsimalluni, ukiullu arlallit Rigsombudsmandiusimalluni. Kommuneqarfik Sermersuumi kommunemi aamma pisortaasimavoq.
Naalakkersuisoqarfimmi pisortatut atorfik inuttassarsiorneqalermat kalaallisut oqaaseqarnissamik piumasaqaatitaqannginnera Partii Naleqqap isornartorsiorpaa, tamassumalu kingunerisaanik tusagassiutini oqallittoqarlunilu Naalakkersuisunut paragraf 37 atorlugu aperisoqarpoq.
Aningaasaqarnermut Naalakkersuisup, Vittus Qujaukitsup, isornartorsiuinerit tamaasa tunngavissaqannginnerarpai erseqqissarlugulu atorfinitsitsiniarnermut kaajallaasitami maleruagassat malinneqartut.