Kinamita taaguunneqarnerpaassava?
Kommuninut Inatsisartunullu qinersisoqareerpat kisitsineq aatsaat taamak pissanganartiginiarpasippoq.
Inuttut taaguunneqarnerpaat Inatsisartuni kikkut issiatitaqarnissaannut sunniuteqarluartarput.
Kingullermik qinersisoqarmat Niels Thomsen 2.773-inik taaguunneqarami Demokraatit qinigaatilluartippai. Niels Thomsenili maanna politikkimit anereernikuuvoq, siulittaasorlu nutaaq Jens-Frederik Nielsen Niels Thomsenituulli taaguunneqarpallaarnissaa ilimanarani.
Ukioq manna inuttut taaguunneqarnerpaajusup issiatitaqarnissamut qanoq sunniuteqartigissanera pissanngatigineqarpoq, pingaartumillu partii ataaseq immikkut eqqumaffiginiarneqartoq tassaavoq: Siumut.
Inuttut ajugaaniuttut
Erik Jensen maanna partiimi siulittaasuusoq imaluunniit partiimi siulittaasuusimasoq maannalu Naalakkersuisuni Siulittaasuusoq Kim Kielsen Siumup qinersisartuinit taaguunneqarnerpaassanersut pissanngatigineqarpoq. Taakku 2018-imi qinersisoqqarmat inuttut 424-nik aamma 2.163-inik taaguunneqarput.
Kim Kielsen qineqqusaarnermi tv-kkut peqataanngikkaluarluni - Erik Jensenimit taaguunneqarnerussappat pissanganarluinnartumik pisoqarlunilu Siumumi avissaartuuttoqarnera takutinneqassaaq.
Danmarkimi ullormut tusagassiisarfik Politiken naapertorlugu isumasiuinermi paasisat allannguuteqassanngippata, IA partiini anginersanngorpat Siumulu pissaaneerulluni ”Kim Kielsenip Erik Jensenillu inuttut ajugaaniunnerat ingerlaannarsinnaavoq”.
IA-mi taaguunneqarnerpaaq
2018-imi Sara Olsvig qinigassanngortittunit tamanit taaguunneqarnerpaalluni 3.360-inik taaguunneqareerluni IA-mi siulittaasutut tunuarpoq. Taannali aamma politikkeritut tunuareerpoq, siulittaasuuffillu 34-nik ukiulimmut Múte B. Egedemut tunniussimallugu.
IA-p siulittaasua inuusuttoq 2018-im qinersisoqarmatat inuttut 233-nik taaguunneqarsimavoq, taamalu taaguunneqarnerpaat qulit akornanniinnani, aamma siulittaasup tulliani Aqqaluaq B. Egedemit inuttut 873-inik taaguunneqarsimasumit taasisukinnerusimalluni.
Illoqarfiit pingaarnersaata kommuniani IA sinnerlugu taaguunneqarluartartuusimavoq Asii Chemnitz Narup. Taannam maanna Inatsisartunut qinigassanngortippoq, 2017-imilu kommunimut qinersisoqarmat inuttut taaguunneqarnerpaalluni 2.259-inik taaguunneqarsimalluni. Taaguunneqarluartarnera Inatsisartunut qinigassanngortinnerani aamma atuutissanersoq pissanngatigineqarpoq.
Taaguunneqarnerpaasimasut qulit
Taaguunneqarnerpaasimasut qulit qiviarutsigit, inuttut taaguunneqarnerpaasimasut simasat politikkeriujunnaarsimapput.
2018-mi Inatsisartunut qinersineq – inuttut taaguunneqarnerit (Sassanngilaq)
1. Sara Olsvig, IA: 3.360 (Sassanngilaq)
2. Niels Thomsen, D: 2.773 (Sassanngilaq)
3. Hans Enoksen, N: 2.531
4. Kim Kielsen, S: 2.163
5. Nivi Olsen, D: 874
6. Aqqaluaq B. Egede, IA: 873
7. Vittus Qujaukitsoq, NQ: 698
8. Randi V. Evaldsen, D: 579 (Sassanngilaq)
9. Tillie Martinussen, Sam.: 480
10. Siverth K. Heilmann, A: 436 (Sassanngilaq)