KNR sinneqartoorpoq
Inuiaqatigiinnik sullissisuulluni tusagassiorfik 2012-mi 3,8 millioner koruuninik sinneqartoorpoq, aningaasaqarniarnerli suli ilungersunarmat aallakaatitat suli ikileriaannaapput
KNR-mi sipaarniarnerit arlalli aqqusaarneqareerput aningaasartuutillu naleqqussarniarlugit sulisunik soraarsitsinerit aqqusaarneqarsimallutik. Maanna KNR 3,8 millioner koruuninik sinneqartoorpoq, nuannaarnissamulli suli siusippallaarpoq.
KNR-mi siulersuisut pissangallutik utaqqivaat Naalakkersuisooqatigilersussat Kalaallit Nunaata Radioanut amerlanernik aningaasaliiniarnersut.
- Aningaasanik amerlanerusunik takuttoqarpat imaluunnit amerliliisoqanngippat pinngitsoorani allannguisoqartariaqarpoq. Atortut pisoqalisut taarsigassaapput sulisullu pikkorissartariaqarput ullutsinnut naleqquttunik, tusagassiornikkut sapiissusilinnik pissanganartunillu aallakaatitassiorsinnaaneq anguneqassappat, KNR-mi siulersuisut siulittaasuat Hans Peter Poulsen Sermitsiaq.AG-mut oqarpoq.
Aallakaatitat ikinnerit
Naalakkersuisuugallartut aalangernikuupput KNRip 15 millioner koruuninik ilanngaasinnaatitaarnera ukiut sisamat ingerlaneranni naleerutsinneqassasoq. Taamaattoq KNR aningaasanik nammineq naliliutai amigartooqqammata KNR-ip aningaasat tungaatigut iliuuseqarsinnaanera killeqarpoq.
- Landskarsimiit aningaasanik amerlanernik tunineqarata atortunik pisoqalisoorluinnartunik taarsersuissagutta aallakaatitaat ikinnerulersinneqaratarsinnaapput, Hans Peter Poulsen oqarpoq.
Aallakaatitat sorliit peerneqarsinnaappat?
- Siulersuisut uagut pisinnaatitaanngilagut ulluinnarni aqutsinermut akuliunnissamut. Taamatut aalajangertoqartalertariaqassappat ulluinnarni aqutsisut tamanna suliassaraat, Hans Peter Poulsen oqarpoq.