Kollegiami ineeqqat mikisuararsuit pisoqqallu
Kollegiami ineeqqat pingajorarterutaat 8 kvadratmeterinik angissuseqarput, Namminersornerullutillu Oqartussat GTO-p barakkitoqaani kollegiat aserfalltsaalisimanngilaat, taamatut allappoq AG.
Kollegiani ineeqqat pingajorarterutaasa missaanniittut ineerannguupput pappialamik qeratasuumik iigallit, barakkini aserfallatsaalineqarsimanngitsuni, ukiut 30-it sinnerlugit matuma siornatigut isaterneqarsimasariaqaraluartuni. Taamatut allappoq AG, innersuussutigalugulu kollegianut pilersaarut, naalakkersuisut illussanik titartaasarfimmut TNT-mut suliaritissimasaa.
Ineqarfinnut pilersaarut naapertorlugu GTO-p barakkerisimasaani 38-ini 437-inik ineeraqarpoq, barakkit tamakkua sanasunut, Kalaallit Nunaannut sivikinnerusumik sivisunerusumilluunniit tikisinneqasimasunut sananeqarsimallutik. GTO-blokkit ukiunik 40 aamma 50-it akornanni pisoqaassuseqarput silataallu ingerlaannavik aserfallatsaalineqartariaqarlutik, soorluttaaq innaallagissamut ikkussukkat ullutsinnut naleqqukkunnaarsimasut immaqalu inatsisinik unioqqutitsisumik ikkussugaallutik, ineqarfinnut pilersaarummi sanaartornermik ilisimasalik oqarpoq.
Namminersornerullutik Oqartussat GTO-p barakkii attatiinnarusukkunikkit tamakkua siunissamut qulakkeerneqartariaqarput, tamannalu 52 millioner koruuninik akeqassaaq. Kollegiani ineeqqat ullutsinni piumasaqaatinik naammassinnissappata 12 kvadratmeterimullu allineqarlutik, suli akisunerussaaq, tassa 85 millioner koruuneqassammata.