Kollegianik amigaateqarneq
Kollegiani inissat 1000-it missaanniittut pisariaqartinneqartut
Ilinniartitaanermut naalakkersuisoq missingiivoq, ilinniartunut illoqarfimmiunut kollegianik innersuussisoqartassappat kollegiat 1000-it pisariaqartinneqartut
Ilinniartitaanermut naalakkersuisup Nivi Olsenip (D) parteeqatimi Randi Vestergaard Evaldsenip paragraf 37 naapertorlugu nunatsinni ilinniagaqartunut inissat qassit amigaataanerannik Namminersorlutik Oqartussat ilisimanninnerannik apeqquteqaataa akissuteqarfigaa.
- Ilinniagaqartunut illoqarfimmi ilinniagaqarfiusumi najugaqartooreersunut aamma inissianik pisariaqartitsisutut naatsorsuunneqartunut innersuussisoqartassagaluarpat nalilerneqarpoq siuliani nalunaarsukkaniit 1000- it missaannik amerlanerusut atorfissaqartinneqassagaluartut, ilinniartitaanermut naalakkersuisoq Nivi Olsen akissuteqarpoq.
Erseqqissaavorli nalilersuineq taanna annertuumik nalorninartoqartoq.
Inissiat attartukkat
Akissummi atuarneqarsinnaavoq, Aasianni, Qaqortui Nuummilu ilinniagaqartunut illoqarfiup avataaneersunut 175-inut imaluunniit meeqqat najugaqatillu ilanngukkaanni inunnut katillugit 281-inut inissiat attartorneqarsimasut 81-iusut.
Kisitsisit Naalakkersuisunit saqqummiunneqartut aggustip 14-iani attartorneqartutut ilisimaneqartuneersuupput.
13 millioninik atuineq
Ilinniagaqartut Aasianni, Sisimiuni, Qaqortumi Nuummilu kollegiani inissanik amigaateqartut inissaqartinnissaannut 2014-imi 13 millioner koruunit sinnilaarlugit atorneqarsimapput.
Ilinniartut avataaneersut namminersortuni inissaqartinniarlugit Nuummi atuineq 8,5 millioner koruuningajaalluni annerpaavoq, Sisimiunilu atuineq 381.000 koruuniusimalluni 2014-imi annikinnerpaalluni.
Ilinniartitaanermullu naalakkersuisup Nivi Olsenip atuinerup ukioq manna taamaaginnarnissaa naatsorsuutigaa.
Kollegialiortiterneq
Naalakkersuisut 2016-imi aningaasanut inatsisissatut siunnersuummi 85 millioner koruunit immikkoortissimavaat ilinniagaqartunut inissianik sanaartornissanut, ukiuni 2017-imiit 2019-imut.
Tamatuma saniatigut Naalakkersuisut paasissutissiipput, Naalakkersuisut aamma soqutigisaqartunik assigiinngitsunik oqaloqateqartut ilinniagaqartunut inissialiornernut attartornikkut aningaasalersueriaasiusinnaasut pillugit, imaluunniit assingusumik aaqqissuussinerusinnaasut, namminersortutpisortallu peqatigiinnerisigut, suleqatigiinnikkut aningaasaateqarfiit assigisaallu eqqarsaatigalugit.