komunefogedit
Kommunefogedinut suleriaasissamik siunnersuusiortoqarnissaa IA'mit piumasarineqarpoq
Kommunefogeditut atorfiit tamarmik inuttalersorneqarnissaata pilersaarusiorneqarnissaa pillugu Naalakkersuisut inatsinik naalakkersuisoqarfimmut saaffiginnittariaqartut, Debora Kleist isumaqarpoq.
Ajornartorsiut nutaatut oqaatigineqarsinnaanngilaq: Kommunefogedit Nunatta nunaqarfiini amigaatigineqarput.
Inatsisinullu ataatsimiititaliami ilaasortaq, Debora Kleist (IA) ajornartorsiutip kiisami pimoorullugu aaqqiivigineqarnissaa sukataarunniarpaa.
Taanna siunnersuuteqarpoq, Naalakkersuisut peqqullugit qallunaat inatsinik naalakkersuisoqarfiannut suleriaasissamik siunnersuusioqqullugit attaveqassasut.
- Ullutsinni nunaqarfeqarfippaaloqarpugut, kommunefogedeqannginnertik pissutigalugu attanneqarsinnaanngisumiillu inissisimavugut. Nalaatarput akuerineqarsinnaanngitsutut nalilertariaavoq, Debora Kleist siunnersuummini tunngavilersuilluni allappoq.
Naatsorsuinerit kingulliit aggustip qaammataaneersut takutippaat, nunaqarfiit aqqaneq-marluk kommunefogedeqanngitsut, nunaqarfinnilu arfineq-marlunni marlunnik pingasunilluunniit kommunefogedeqartussaangaluarlutik ataasiinnarmik kommunefogedeqartut.
Taamaammat Inatsisinik atuutsitsinermut Naalakkersuisoq, Sara Olsvig (IA) parteeqatimi naliliineranut isumaqataavoq.
- Naalakkersuisut isumaqarput nunaqarfinni arlalinni kommunefogedit amigaataanerat akueriinnarneqarsinnaanngitsoq, taanna akissuteqarluni allappoq.
- Kommunefogedit amigaataanerat innuttaasut inatsisitigut illersorneqarsinnaanerannut nalornilersitsivoq, najukkaniittunullu toqqissisimannginnermik pilersitsisinnaalluni.
Naalakkersuisut inatsisinut susassaqarfik tamakkerlugu periusissatut suliassanullu pilersaarutissaq sulissutigaat. Tassani kommunefogedinut suliniuiteqarneruneq ilaassaaq. Tamanna tunngavigalugu Sara Olsvig (IA) siunnersuummut tapersiivoq.
Kommunefogedinik amingaateqarneq ukiuni kingullerni arlaleriarluni pitsanngoriaateqarsimavoq. Tamanna pillugu inatsisinik susassaqarfik ukioq manna Christiansborgimi annertuumik tusarniuutigineqarnikuuvoq. Taamatuttaaq Sara Olsvig (IA) inatsisinut minister Søren Pape Poulsen (K) ataatsimeeqatiginerani apeqquteqarsimavoq. Tamannalu Folketingimi eqqartorneqarsimavoq.
Siunnersuut ullumi Inatsisartuni oqallisigineqassaaq.