Kommunip pinngortitamut qimaannakkat inuttassarsiorai
Kommuneqarfik Sermersooq Narsaarsummi avatangiisinik mingutsitsinermut akisussaasunik ujaasivoq, Narsaarsummi qimaannakkat tuttunniat siumorsimavaat.
Pinngortitami qimatat uku ilisarisinnaavigit? Taamaappat Kommuneqarfik Sermersuup tusarfigerusuppaatit. Narsaarsummi Nuup Kangerluaniittumi qimaannarneqarsimasut pillugit Kommuneqarfik Sermersooq taamatut nalunaaruteqarpoq.
Frederik Josefsenip ikinngutini ilagalugit tuttunniarluni Narsaarsummukarami takusai tujorminarsimaqaat. Toqqit arlallit, madrassit, natersuit, gassit, ikumasartut, igat, nerisassat qillertuusaniittut allarpassuillu pinngortitamut qimanneqarsimapput.
Pinngortitamik illersuinissaq ataatsimut suliassaavoq, taamaattumillu inuit pinngortitamik taamatut innarliisimasut takullugit nakeriallannarpoq. Pinngortitamut nassatat nammineq angerlaattarnissaat isumagineqassaaq, kommunimit oqaatigineqarpoq.
Pisattat ilai ilisarisinnaagukkit sai@sermersooq.gl-imut saaffiginnigit imaluunniit oqarasuaatikkut: 34 70 00. Kommunip siullermik akisussaasut peqqussuteqarfigissavai tamannali aaqqiissutaanngippat, politiinut nalunaarutigineqassaaq.