Kommunit namminersornerusut inissiaataat nungullartut tigorusunngilaat
Namminersornerullutik Oqartussat inissiaataasa 7.500-t iluarsaanneqarnissaannut pisariaqartitsinerup aningaasartai 2000-imi 2,1 milliardiniit ullumikkut 2,4 milliarder kronenngorsimapput.
Inissat iluarsaanneqartariaqartut Nuummi amerlanerpaapput.
- Nuummi namminersornerullutik Oqartussat inissiaataasa 2.793-iusut iluarsaanneqarnissaat 1,1 milliard kronenik naleqassaaq, Atta´veqarnermut Avatangiisinullu Naalakkersuisoqarfimmi pisortaq ilisimatitsivoq.
Pingaartumik Lille Slette-mi, Narsarsuarmi, Blok P-mi Radiullu Qaqqaani inissiat namminersornerullutik oqartussanit aserfallakkiartortinneqarsinapput
Nuup borgmesteriata Nikolaj Heinrichip kommunit nutarterneqarnerannut atatillugu borgmestereqatigini mianersoqquai, inissat illullu aserfallassimasut namminersornerullutik oqartussaniit tigullaqunagit.
- Iluarsaassinissamut aningaasartassat pisariaqartinneqartut ilaatinnagit tigusinissaq ernumanartoqartippara.
Iluarsaassinissamik pisariaqartitsinerup annertoorujussuup qaangerniarnissaanut aqqutissaasinnaasut isumassarsiatsialaat ilagaat inissiat illullu aserfallassimasut aserorteriarlugit inissianik nutaanik attartortittakkanik, piginneqatigiilluni illulianik imaluunniit illut nammineq illussatut pisiassanik sanaartornissaq.
Nuummi sinerissamilu illoqarfinni allani suliassaq taanna blokersuarnut altanilinnut qaqortunut 1960-ikkunni 1970-ikkunnilu annerpaamik attuumatinneqarpoq.
Ullumi Sermitsiami aamma atuaruk.