Kujataani erinarsoqatigiit aqqanillit katerisimaalersut
Erinarsoqatigiit Qaqortumit, Narsamit Nanortalimmillu aggersut qanittukkut Qaqortumi katersuutissapput
Erinarsoqatigiit aqqanillit Qaqortumit, Narsamit Nanortalimmillu aggersut aggustip aallartinnerani sapaatip-akunnerani 32-mi erinarsornermik erinarsoqatigiinnullu aqutsisuunermut pikkorissarneqarnissamut periarfissinneqassapput.
Taama Kujataamioqatigiit Nipaata siulittaasua Sika Frederiksen oqaluttuarpoq.
Mads Lumholtip pikkorissaanissaa siunertaasimagaluarpoq, taannali periarfissaqarsimanngilaq, taarsiullugulu Janne Wind tikissalluni.
- Erinarsoqatigiinnik pingaartitaqarluinnartuuvoq. Inuunini tamakkerlugu erinarsoqatigiinni erinarsoqataasarsimavoq, siulersuisuusarluni aqutsisuusarlunilu sammisaqartitsinernillu isumaginnittarsimalluni.
- Jannep ataasinngorpat Qaqortumut tikippat takunissaanut qilanaarpugut, aamma erinarsoqatigiit Narsamit, Nanortalimmit Qaqortumillu aggersut takunissaannut. Erinarsoqatigiinnut aqutsisuusarneq ulluni marlunni pikkorissaassutigeqqaassavaa, tamatumalu kingorna ulluni pingasuni erinarsoqatigiinnik pikkorissaassalluni. Erinarsoqatigiit katerinnertik naggaserlugu arfininngornermi aggustip aqqarngani Qaqortup Timersortarfiani katerisimaassapput, Sika Frederiksen oqaluttuarpoq.