Kujataani ilinniarfeqarfiup atini allanngortikkaa

Campus Kujalleq.

Qaqortumi ilinniarfeqarfiit Kujataani Ilinniarnertuunngorniarfik kiisalu Niuernermik Ilinniuarfiup aggustusip aallaqqaataani ukioq kingulleq ataatsimuulersut nutaamik taama ataatsimoortumik ateqalerput.

Forstanderi Steffen Lund nalunaaruteqarpoq.

Atuarfik nutaaq 350-it 400-llu akornanni atuartoqarsinnaasoq 75-inik sulisoqarpoq, taamaasilluni nunatta kujataani ineriartoqqinnissamut suleqataanermut peqataassalluni, suliffeqarfik Kommune Kujallermi anginersaasa ilaraat.

- Atuarfipput nutaamik ateqalertussaammat iPadimik unammisitsivugut. Atinik 45-nik siunersuuteqartoqarpoq, amerlasuullu atorluarneqarsinnaagaluarlutik. Siulersuisunit atit tallimat toqqarneqarput pitsaasutut isigineqarmata, taakkulu klassinit sorleq pitsaanerunersoq taaneqarluni. Klassillu tamarmiusut Campus Kujalleq isumaqatigiissutigivaat atuarfiup atigilissagaa, forstanderi oqarpoq.

- Atitta nutaap Campus Kujallip takutinniarpaa ilinniarfeqarfiusugut nunarsuarmioqataasut. Atuarfiit ataatsimuulersimanerat takutinniarneqassaaq. Ati toqqarneqartoq pitsaasuuvoq inissisimaffitsinnut tulluartuulluni. Siunissami aaku suleriaasissat:

• Ilinniaqqinnissamut suut ingerlaqqiffigineqarsinnaassanersut malunnarnerulissaaq kiisalu ilinniarfeqarfiunera ersarinnerulissalluni:

• TNI-mi periarfissat amerlanerusut

• Ilinniarfeqarfinnit nalinginnaasuni periarfissat amerlanerusut

• Pisiniarfeqarnermut ilinniarfimmi ingerlariaqqiffiit amerlanerusut

• Perorsaanermik ineriartornermi pitsaanerusumik ingerlariaqqiffiit

Campus Kujallip nittartagassaa apriilimi ammarneqassaaq, ateqassallunilu cak.gl