Kujataani kommunit Alluitsumi suliassat piviusunngorteqquaat
Nunatta Kujataani kommunit pingasuusut, Qaqortup, Narsap aamma nanortaliup kissaatigaat, SIK-p Sulisartut Højskoleatalu pissutsit eqqarsaatigeqqissagaat, pilersaarutit ingerlaannarsinnaaniassammata, periarfissatullu allatut suliassat Nammersornerusut tigussagaat.
Nunatta kujataanni kommunit pingasuusut KNR-ikkut ippassaq tusagartik tupigusuutigaat, tassa SIK Sulisartut Højskoleallu Alluitsumi sanaartornerupiluani ilinniartunut pilersaarummit aninerat. Pilersaarut Sulisartut Højskoleani pisortap Kaj Lyberthip nunamut tamarmut iluaqutissanngorlugu nukippassuit suliarpassuillu atorlugit anguniarsimasaa.
– uagut kujataani kommunit tungaanniit ukiorpassuit ingerlanerini Alluitsup piujuaannartittariaqartup siunissaa qulakkeerniarlugu suliniartuarsimavugut, kulturikkut oqaluttuarisaanikkullu nunatsinnut annertuumik pingaaruteqarmat.Pilersaarutaasimagaluarput Alluitsumi siunissami højskole-rtitsisarnissat pikorissartitsisarnissallu.
– Taamaattumik pilersaarut pitsavissuaq Realdania-p, BAT-kartellet-ip, namminersornerusut, SIK-p Sulisartut Højskoleat kujataanilu kommunit pingasuusut suleqatigiinnerisigut suliarineqaraluarpoq, taamalu pilersaarummut isumassasseqqaartup Kaj Lyberthip pilersaarummut 24 millioner kronenik piussarsiniarneq iluatsissimavaa, taamaalilluni qatanngutiginniat illutaasa illullu allat sukumiisumik nutarterneqarsinnaanerat aallartinneqarsinnaaleraluarluni.
– Ulluni makkunani inuusuttortatta sulinermut kajumissuseqalersinniarnerat aallartittariaqarlugu oqallisigaarput. Pilersaarullu una tamamik ilinniartunit kalaallit nunaanniit danmarkimeersunillu peqataaffigineqartussaq ilinniartut ilinniarfissaattut ilusilersugaavoq. Ilinniartut pisinnaaffinnik immorluinnaq ittunik piginnaasaqatiitigalutik ilinniakkaminnik naammassisinnaagaluarput, kommunit pingasuusut borgmesterii tusagassiorfinnut nalunaarumminni allapput. Taakku pilersaarutip piviusunngunngitsoornissaa aammalu suleqatigiit ilaasa pilersaarummit tunuartilersinnaanissaat assorsuaq ernummatigaat, tassami pilersaarusiornerani aallartisarneqarneranilu maannamut aningaasarpassuit atorneqareermata.
Taamaattumik borgmesterit SIK Sulisartut Højskoleallu kajumissaarpaat pissutsit eqqarsaatigeqqeqqullugit, pilersaarut ingerlaannarsinnaaniassammat, periarfissatullu allatu Namminersornerusut suliaq tigusinnaagaat.
– narsap, Qaqortup Nanortaliullu kommuniiniit aaqqiissutissamik nassaarniarluni oqaloqatigiinnissamut piareersimavugut. Pilersaarut taamaatiinnassallugu iluatinnarpallaarpoq, Simonj Simonsen, Qaqortoq, Kiista P. Isaksen, Narsaq aamma Kristine Raahauge Nanornortalik, allapput.