Palasit ajoqillu
Kullorsuaq sullinnerlunneqarpoq
Atassutip nunani illoqarfinni nunaqarfinnilu ilagiit sullinneqarnerat pitsanngorsaqquvaa siunnersuutigalugulu sumiiffinni tamani 400-t sinnerlugit inulinni palasimik atorfitsitsisoqassasoq
Atassut tunuliaqutaralugu Inatsisartunut ilaasortat Gerhardt Petersenip (aamma partiip siulittaasuata) Knud Kristiansenillu nunami illoqarfinni nunaqarfinnilu palasinik ajoqinillu amigaateqarneq misissorneqaqquvaat. Taakkumi isumaqarput nunami ilagiit sullinneqarnerat naammanngitsoq. Inassutigaat sumiiffinni tamani 400-t sinnerlugit inulinni palasimik atorfinitsitsisoqassasoq.
Tamanna takuneqarsinnaavoq paragraf 37 naapertorlugu Naalakkersuisunut apeqqutaanni, taannalu aallaaveqarpoq nunami nunaqarfiit annersaasa ilaanni Kullorsuarmi 400-500-nik inulimmi palaseqaraniluunniit ajoqeqannginneranik.
– Innuttaasut anersaakkut sullinneqarnerata pitsaasumik inissisimaneratigut inuiaqatigiit nukittuumik inissisimanerat qulakkeersimaneqassasoq ATASSUT-mit isumaqarpugut, taamaammat ilagiit sullinneqarnerat pitsaasuullunilu aalaakkaasuusariaqartoq isumaqarpugut, Atassummit politikerit allapput, nangillutilli:
– Qujananartumik paasinninnerput malillugu sumiiffinni amerlanerpaani ilagiit aalaakkaasumik pitsaasumillu sullinneqarput, taamaattorli aamma sumiiffiit ilaanni pitsanngorsaasoqartariaqartoq ATASSUT-mit takusinnaavarput.
– Matumani immikkut eqqarsaatigaarput Upernaviup nunaqarfittaasa ilaat Kullorsuaq. Kullorsuarmi innuttaasut aalaakkaasumik 400-it 500-llu akornanni innuttaqartumi, upernaarli ilagiit ajoqeqanngillat atuaasuinnarmillu sullinneqarlutik, Gerhardt Petersen Knud Kristiansenilu isumaqarput tamanna naammaginanngitsuusoq. Taamaattumik Kullorsuarmiut anersaakkut pitsaasumik aalajaatsumillu sullinneqaqqilernissaat kissaatigaat.
Taakkua aperipput:
1)Kullorsuarmi qaqugu ajoqimik atorfinitsitsisoqaqqissava?
2)Nunatsinni nunaqarfinni illoqarfinnilu palasit ajoqillu amigaataanerat qanoq annertutigiva?
3)Nunaqarfinni illoqarfinnilu 400-it sinnerlugu amerlassusilinnik innuttaasulinni palasimik atorfinitsitsisoqarsinnaanera Naalakkersuisut aqqutissiuukkusussinnaavaat?
Taakkuupput matumani apeqqutigiumasagut, naatsorsuutigaarput suleriaaseq malillugu ullut nalinginnaasumik suliffiusut qulit qaangiutsinnagit akissutisissalluta.
Inussiarnersumik qinnutigaarput akissut Inatsisartoqarfimmut nassiunneqarnerata saniatigut toqqaannartumik uagutsinnut atassut@inatsisartut.gl –mut nassiunneqassasoq.