Kuultisiorfik matussaaq
Suliffeqarfimmi Crew Gold Corporationimi pisortat aalajangerput Nalunami piaaneq unitsinneqassasoq. Tamanna pivoq qarusummi ingerlatsinnermi aningaqarniarneq nalilersoriarlugu
Nalunami piiarneqarsinnaasut suliffeqarfiup ilimagisaanut naleqqukkunnaarput, ilaatigut mannakkut piaanermut, assartuinermut kiisalu kultimik suliarinneqqinnermut aningaasartuutit isertitaninngaannit amerlanerummata, taamaattumillu imminut akilersinnaanani, suliffeqarfik nalunaarpoq
Nunarsuaq tamakkerlugu aningaasarsiornikkut ajornartorsiorneq aamma Nanortallup eqqaani kultisiorfiup matuneqarnissaanut aalajangernermut pissutsit ilagivaat, knr.gl allappoq. Tunisassiornermut aningaasartuutit piffissami kingullermi kultip tuniniarnerani isertitanit amerlanerusimapput. Tassa imaappoq suliffeqarfiup ounce ataaseq - imaluunniit kulti 30 gramit missaaniittoq tunisassiarigaangamiuk 937 dollar aningaasartuutigisarpaa, suliffeqarfiullu tunisinermini ouncemut 857 dollar pissarsiariarisarlugit.
Crew Gold Corporationili erseqqissaavoq suli qaarusummi kultisiorfimmi kulteqartoq. Taamaattumik suliffeqarfik maannakkut suleqatissarsiorluni aallartippoq. Suliffeqarfimmi soqutiginarnerutinneqarput suleqatigisassat nunarsuaq tamakkerlugu tuniniaanermik ingerlatsisinnaasut.
- Maannakkut saffiugassamik piaaffigineqartoq 2008-p naalernerani nunguppat qarusummi piianeq unitsinneqarallassaaq. Qaarusuk nakkutigineqartuarallassaaq qanoq pisoqarnissaanik aalajangertoqarnissaata tungaanut. Saffiugassaq kultitalik piiarneqareersoq Nugget Pondimut Newfoundlandimut suliarineqarfissaminut assartorneqassaaq, Aatsitassanut Ikummatissanullu pisortaqarfimmi pisortaq Jørn Skov Nielsen tusagassiutitigut nalunaarummi allappoq.
Kultisiorfik ammarneqarmat naatsorsuutigineqarpoq taamani peqassusia ilisimaneqartoq tunngavigalugu, naatsorsuutigineqarpoq ukiuni sisamani ingerlanneqarsinnaanera. Kultisiorfik Nalunaq sukumiisumik piiaaffigineqalerpoq 2004-p aallartinnerani.
- Aatsitassanut Ikummatissanullu Pisortaqarfiup suliffeqarfik pisup qanoq ingerlanneqarnissaa aammattaaq matusisoqarsinnaanera pillugu qanimut suleqatigaa. Suliffeqarfik piaanissamut akuersissummi piumasaqaatit tunngavigalugit aningaaserivimmi qularnaveeqquteqarpoq/aningaaserimmi uninngasuuteqarpoq matusinissamut aningaasartuutissanut matussutissanik, Jørn Skov Nielsen oqarpoq.