Kuupik: Piffissaa killiligaanngitsumik pineqaatissiisarneq atorunnaarsinneqarli
Piffissamik killiligaanngitsumik pineqaatissiisarneq ullutsinnut naleqqutinngilaq, naalakkersuisut siulittaasuat isumaqarpoq.
Annonse
- Inuiaqatigiit ilaatigut nalilerneqartussaapput sanngiinnerpaartaminut qanoq iliornermigut. Maani Kalaallit Nunaanni sanngiinnerpaanut ilaapput pineqaatissinneqarsimasut ukiorparujussuarni parnaarussaaqqasartut. Taakku ilaat piffissaa killiligaanngitsumik pineqaatissinneqarsimallutik Herstedvesterimi Danmarkimiittumi parnaarussaaqqasarput. Herstedvesterimi parnaarussaaqqasunit allanit allaassutigalugu ilisimanngilaat qaqugu inuiaqatigiinni inooqataaqqilersinnaassanerlutik.
- Killiligaanngitsumik pineqaatissiisarneq ullutsinnut naleqqutinngilaq danskillu inatsisinik atortitsinermut ministeriannik Lars Barfoed oqaloqatiginnissutissaqqissuulluni, taama oqarpoq Naalakkersuisut siulittaasuat Kuupik Kleist.