Kuupik USA-mit aningaasaliissuteqarniarneq pillugu: Tarnerput tiaavulumut tuneratarsinnaavarput
Naalakkersuisunut siulittaasuusimasup ernumassutigaa, Kalaallit Nunaat naalagaaffiit pissaanilissuit sunniuteqarniunneranni isiginnaartuuinnartutut inissisimaqqilernissaa
Donald Trumpip Kalaallit Nunaannik pisiaqarusunneranik itigartitsisimaneq kikkunnit tamanit isumaqatigineqaraluartoq, politikkerit oqaaseqartartullu arlallit amerikamiut soqutiginnikkiartuinnarnerat iluaqutissartaqarsoraat. Tamanna aamma nunanut allanut tunngasutigut ingerlatsineq pillugu nalunaarusiami Naalakkersuisut ippassaq saqqummiussaanni takuneqarsinnaavoq.
IA-mili Naalakkersuisunullu siulittaasuusimasup Kuupik V. Kleistip taamatut ineriartortoqarnera ernumassutigineruaa. Tusagassiorfimmit High North Newsimit apersorneqarnerani tamanna takuneqarsinnaavoq.
Soqutinnikkiartuinnartoqarnera Naalakkersuisunit iluaqutigineqarsinnaanersoq pillugu aperineqarami Kuupik V. Kleist akivoq:
- Aatsaat soqutiginninneq iliuuseqarfigineqarpat, tassa susaqarani oqaaseqaannartarnermut sanilliullugu, uangalu isumaqarpunga tamatta oqaaseqaannartartugut. Ajornartorsiutaasoq tassaavoq, Trumpip Kalaallit Nunaannik pisiaqarusunnerata sumiiffimmik tamarmiusumik tiguaanera, taamaalilluta - aammaarluta - Issittoq pillugu pissaaneqarniunnermi Kallaallit Nunaata qeqqaniinnera isiginnaaginnarparput, soorlu sorsunneq nillertoq atuummat taammaassimasugut. Tamanna toqqissisimananngilluinnartuusoq oqaatigisariaqarpara, High North Newsimut oqarpoq.
- Taakku kiniiserit naak?
Kuupik V. Kleist isumaqarpoq, Amerikamiut soqutiginninnerannut taamaallaat pissutaasoq, USA-p Issittumi sakkutooqarnerminik ikilisaangaatsiarsimanera. Maannalu Kalaallit Nunaanni sakkuutiminik annertusaaqqikkusulernera.
- Tamatumunnga pissutaavoq kiinamiunit ulorianartorsiortinneqarsorineq. Kiinamiulli taakku naak? Arlaannaanniinngillalluunniit.
Kuupik V. Kleist taamaammat isumaqarpoq, Kalaallit Nunaanni timmisartoqarfiliorniarnermi Amerikamiut aningaasaataannik pissarsinnginnermi eqqarsarluaqqaartoqartariaqartoq.
- Apeqqutaavoq, suliassamut atatillugu aningaasaliiffigineqarusukkaanni: Sunarpiaruna tunineqarniartoq? Tarneq tiaavulumut tunineqassooq, High North Newsimut oqarpoq.