Kuupiup Margrethe itigartippaa
Naalakkersuisut siulittaasuat Kuupik Kleist Dronning Margrethep 70-iliilluni inuuissiorneranut ornigunnavianngilaq. AG atuaruk.
Nalinginnaasuuvoq Naalakkersuisut siulittaasuata Inatsisartullu siulittaasuata Dronning Margrethemit allanillu kunngikkormiunit akimanerusunit pisortatigoortumik qaaqqusaatilutik takkuttarnerat. Dronning Margrethelli apriilip 16-ani 70-iliilluni nalliunnerani taamaassanngilaq.
Taarsiullugu Kuupik Kleist Inatsisartut upernaakkut ataatsimiinneranni naalakkersuinermik suliaminik pingaartitsineruvoq. Ataatsimiinneq taanna sulianik pingaarutilippassuarnik imaqarpoq, sapaatip akunnerini ikittuinnarni suliarineqartussanik. Taamaalilluni Fredensborg Slotimi kunngikormiut peqatigalugit inuuissiornermi nalliuttorsiuaarnissamut nerinertaqarlunilu qitiffiusussamut naaggaarpoq.
AG-p paasisai naapertorlugit Inatsisartut siulittaasuat Josef Motzfeldt nunarput tamaat sinnerlugu peqataajartussaaq.Tamannali kunngikkormiunit ilumoornersoq oqaatigineqanngilaq, qaaqqusammi akimasuut kikkut takkutissanersut avammut nalunaarutigineq ajorpaat.
Suna pisortatigoortumik Dronning Margrethemu arlaleriarujussuarluni nunatsinniittarsimasumut tunissutaassanersoq suli ilisimaneqanngilaq.