Lars-Emil: Immeraassutissaqanngilaq
Namminersornerup ukiut qulit ingerlaneranni annerusumik angusaqarfiusimannginnera Lars-Emil Johansenip pakatsissutigaa
Politikkikkut suliami Kalaallit Nunaata maajip 1-ani 1979-imi namminersornerulerneranik juunillu 21-ani 2009-mi namminersulerneranik kinguneqartumi issuakkat tusaamaneqarnersaasa tusaamanerlugaanersaasalu ilaat Socialdemokratit ministeriunerutitaannit Anker Jørgensenimeersuuvoq:
– Immeraassutissaqanngilaq!
Oqaaseqaat sakkortooq taanna 1976-imeersoq Kalaallit Nunaata aatsitassanik piginnittussaanermik piumasaqaateqarneranik itigartitsineruvoq, kisianni Naalakkersuisut Inatsisartullu siulittaasorisimasaat Lars-Emil Johansen, 1946-mi inunngortoq, issuakkap oqaasertaanut ullumikkut isumaqataavoq:
– Immeraassutissaqanngilaq. Kalaallit Nunaat ullut ilaanni namminiilivikkumaarpoq. Tassunga sammiveqartumik ingerlasoqarpoq. Danmarkimut sorsunnerunngilaq, pissusissamisoortumilli ineriartornerulluni. Apersortittumik angerlarsimaffimmini najugaqaannarnissaminik inuunermini takorluugaqartumik naapitaqanngisaannarsimavunga. Naagga, takorluukkat annersaat tassaavoq nammineersinnaalernissaq. Uagullu soorunami tamatuminnga aamma takorluugaqarpugut, Lars-Emil Johansen Sermitsiamut oqarpoq.
Namminiilivinnissaq
– Namminiilivinnissamik kissaat ullumikkut namminersornerup ukiunik qulinngortorsiornissaanut sapaatip-akunnerata ataasiinnanngorfigisaani sumi inissisimava?
– Nammineernerulernissamik kissaammik takusaqarpunga. Namminiilivikkiartuaarpugut, imaassinnaavorli namminiilivinnissamik pisariaqartitsineq taama pinasuartigiunnaarsimasoq. Immaqa suli utaqqissunneqarnerulaarsinnaassaaq, Kalaallit Nunaata Danmarkillu akornanni suleqatigiinneq naammaginartumik ingerlassappat, assersuutigalugu Kalaallit Nunaat nunanut tunngasuni oqaasissaqartitaanerulissappat. Naluara, aammami imaassinnaavoq, Kalaallit Nunaat kinguarsaataasumut naaggaartoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: