Aleqap atornerluinera
Lars-Emil: Taamaammat uppisinneqarput
Politikkikkut allaffissornikkullu killiliisinnaanani aqutsinerlunneq, taakkuupput maanna Inatsisartut siulittaasorilersimasaata, Siumumeersup Lars-Emil Johansenip, Naalakkersuisut uppisinneqarnerannut patsisaasorisai
- Politikkikkut aqutsinerlunneq, ataqatigiissaarisinnaannginneq allaffissornikkullu pikkorlunneq, immaqa tassa tamakkua pissutaallutik Siumut uppisinneqarpoq, taama Lars-Emil Johansen, Naalakkersuisut pingasunngornermi uppisinneqarnerisa kingorna maanna Siumut sinnerlugu Inatsisartut siulittaasorilersimasaattut inissittoq, oqarpoq.
Atuaruk: Lars-Emil: Paatsiveerusimaartoqarpoq
Siumumi ukiorpassuarni politikeriusimasup, Lars-Emil Johansenip, aamma ilimagivaa Aleqa Hammondip Inatsisartunut marsimi 2013-imi qinigaarujussuarnera aqutseriaasianut sunniuteqarsimassasoq:
Qinigaarujussuarneq sorujussuanngortitsisimagunartoq
- Aleqa Hammondip (6.818-inik taaneqarluni, aaqqissuisoqarfik) qinigaarujussuarnera inuttaanut immaqa aamma sunniuteqarsimassaaq, immaqa isumaqarsimavoq qanorluunniit iliorsinnaalerluni, Lars-Emil Johansen oqarpoq nangillunilu:
- Pissaanermik tunineqarsimagaanni aqutsinissamut, taava maniguunneq sutigullu tamatigut sissuernissaq pisariaqarpoq. Aamma maligassiuisuusariaqarpoq, Lars-Emil Johansen oqarpoq.
Atuaruk: Naalakkersuisut uppisinneqarsinnaanngorput
Allattoqarfik sanngiitsoq
Lars-Emil Johansen aamma isumaqarpoq allaffissornikkut aqutsinermi pikkorliortoqarpallaarsimasoq killiliisinnaasoqarsimanngitsorlu piffissaangallartillugu:
- Killiliisoqartariaqarpoq pissusissamisuunngitsumik allaffissornikkut naammattuuigaanni, Lars-Emil Johansen oqarpoq, nangillunilu:
- Nunatsinni naalakkersuinikkut patajaatsumik inissisimanissaq pisariaqalerpoq. Taamaammat partiit anginerit ataatsimooruttariaqalerpaat suliniutit annertuut. Aalajangigassani annertuuni suleqatigiittoqartariaqalerpoq. Aammalu naalakkersuisooqatigiinnik pilersitsinermi tunuliaqutarissaarnissaq pisariaqalerpoq, arlaata kukkunissaa utaqqiinnarnagu, Lars-Emil Johansen taama naggasiivoq.
Aleqa Hammondip pisortat aningaasaataannik atornerluineranut allaaserisat allat uani atuakkit