Lastiata affaannaa imaqarpoq
Ukioq manna Ittoqqortoormiunut umiarsuit marluusussat siullersaat lastiata affaannaa imaqarluni tikippoq.
– Aatsaat siullerpaamik umiarsuaq taamak usinikitsigaluni tikippoq. Siornamut naleqqiullugu usingi affaannaapput. Ittoqqortoormiuni Pilersuisut pisiniarfiata pisortaa Jørgen Danielsen nalunaarpoq.
Illoqarfinni tamani ukioq kaajallallugu umiarsuarnik tikinneqartanngitsuni umiarsuaq siulleq tamatigut pingaartorsiutaasarpoq, kiisalu ukioq manna Nunatsinni illoqarfiit avinngarusimanerpaartaasa illaannut umiarsuup siulliup tikinnera immikkut illuinnarpoq. Umiarsuarmi peqqumaatissanik inuiaqatigiinnguit ukioq kaajallallugu atortussarisassaannik ulikkaavilluni tikittaraluarpoq.
Jørgen Danielsen naapertorlugu usit taamak ikitsiginerannut pissutaassoq tassaavoq sanaartornissamut atortussanik useqannginnera, tamatumunngalu pissutaavoq kommunit kattussuutsinneqarnerisa kingorna sanaartornerup unitsinneqarluinnarsimanera.
Kommunit kattussuutsinneqarnerisa kingorna illoqarfimmiit nutserneq annertuserujussuarsimavoq innuttaasullu maannakkut 450-iupput. Ukiup ataatsip ingerlanerani appariaat 50-iulluni.