Løkkenimi palasi aamma nissiaqqanik asissuisoq qunusaarneqartoq
Nutartigaq 8.50: Oqaluffiup isuaniittumi qimitsisarfimmiittoq juullimi nissiaraq tillinneqarsimavoq. Oqaluffimmi attaveqanngitsumit palasimit Jyllandip avannaani Løkkenimi qimitsisarfimmut nissiaraq annoraaminermik sanaaq oqaluffiup isuata iigartaanut nivinngarneqarsimavoq. Maanna taanna qunusaarneqarpoq.
Nissiaraq annoraaminermik sanaaq Vendsysselimi Løkkenimi oqaluffiup attaveqanngitsup isuata iigartaanut nivingakkap kinguneranik oqaluffiup palasianik, Jon Knudsenimik, qunusaarinermik kinguneqarpoq.
Taassuma nissiaqqamik qimitsisarfimmi sapaammi "toqutsinerata" kingorna Jon Knudsen arlallinnit qunusaarneqarpoq, arlaallu politiinut unnerluutigineqarluni.
- Tamanna ilutigalugu ilagiinnut sillimasoqarnissaa pisariaqarsimavoq oqaluffimmi aserorterisoqannginnissaa siunertaralugu, Jon Knudsen oqarpoq.
Unnuakkut mobilini qaminngatittarpaa akornusersorneqannginniassagami.
Løkkenimi palasip siornatigut aamma taamatut pineqartarpoq, tassami ukiorpassuarni juullimi nissiaqqanik akerliusutut ilisimaneqarpoq. Angerlarsimaffianni, nuliami qitornamillu pingasut ataatsimik, pingasunik tallimanillu ukiullit, tamakku takussaaneq ajorput.
Jon Knudsen isumaqarpoq nissiaraq tassaasoq "illumi anersaaq" ajortuusoq.
- Uanga isumaqarpunga nissiaraq anersaapiluusoq asiginnarneqartussaq. Nunat avannarliit kristumiunngortinneqarmata oqaluffik taamatut iliortarpoq, Jon Knudsen oqarpoq.
Nuannarinngilaa nissiaqqat meeqqanut sammitinneqariartuinnarnerat.
- Apeqqutigerusuppara: Meerartagut kiap tiguassavai. Nissiaqqat guutipiluusut imaluunniit Jesusip.