Londonimi saassussineq
Londonimi peqqarniisaarniarluni saassussisoqarnerani inuit sisamat toqutaapput
Londonimi peqqarniisaarniarluni saassussisoqarnerani inuit sisamat toqutaapput ikinnerpaamillu 20-it aqqunarneqarsimallutik, politiit tusagassiuutinut katersortitsinerminni paasissutissiipput.
Ullumi Londonimi Tuluit parlamenteqarfiata qanitaani saassussisoqarnerata kingorna inuit ikinnerpaamik 20-it aqqunarneqarput sisamallu toqutaallutik.
Politeeq toqutaasoq
Politeeq ataaseq toqutaasut ilagigaat, politiit tusagassiuutinut katersortitsinerminni paasissutissiipput.
Maannamut misissuinerit allannguuteqassanngippata, saassussineq peqqarniisaarniarluni saassussinertut taaneqarpoq, Londonimi, Metropolitan Police, oqarpoq.
Franskit ilinniartut aqqunartut
Franskit ilinniartui aqqunarneqarsimasunut ilaasut, franskit ministeriunerat oqarpoq.
Parlamenteqarfiup eqqaa politiinik piareersimasunik ulikkaarpoq, takunnissimasut oqarluttuarput. Inatsisartoqarfimmi politikerit sulisullu aneqqusaajunnaaqqapput.
Pisut marluk eqqartorneqarput tulleriinginnarlutillu aallartissimallutik, BBC-p oqaluttuarpoq.
Atuaruk: Londonimi peqqarniisaarniarluni saassussisoqartoq
Pisoq siulleq Westminster Bridgemi (ikaartarfissuaq) biili piaaraluni inunnik arlalinnik apuisimavoq. Biili pineqartoq taartuusoq BBC-ip assiutaani takuneqarsinnaavoq, biili ungalulerneqarsimasumut pulasimanissaa ilimagineqarpoq.
Politeeq savimmik kapitittoq
Pisup aappaa parlamentip allaffissuata isaariaata eqqaani pivoq. Tassani angutip politeeq savimmik kapitisimavaa, kingornalu politiinit aallaaneqarluni. Parlamentip ilaani aqutsisoq, David Lidington, oqarpoq.
Aqqunarneqarsimasut qasserpiaaneri suli ersarissumik paasineqanngilaq. Westminster Bridgemi inuit aqquneqarsimasut qulit passussimavagut, Londonimi ambulancit allapput.
Maannamut saassussinermi aqqunarneqarsimasutut 20-it nalunaarutigineqarsimapput.