Maleruaqqusat nutaat: Tikittussat tamarmik akiuussusersorneqarsimassapput

- Aasaanerani sulinngiffeqarnerullu nalaani angallanneq maanna annertuvoq. Tamannalu nuna tamakkerlugu tunillaasuuttoqarsinnaaneranut aarlerinartitsisinnaavoq. Soorlu massakkut tuniluunerup takuneqarsinnaaneratuut, Naalakkersuisut siulittaasuat, Múte Borup Egede, tusagassiortunik sisamanngornermi katersortitsinermini taama oqarpoq.

Ilaquttat kammalaatillu takorniornerini eqitaarnerit qanillinerillu pinaveersaartinneqarnissaat, taassuma innersuussutigaa.

Arlaatigullu ersiuteqaraanni angalannginnissaq aamma innersuussutigineqarpoq. Air Greenlandimi billetsit suli allanngortinneqarsinnaasut, Múte B. Egedep paasissutissiissutigaa.

Kingullertigut tuniluuttoqarnera pillugu maleruaqqusat amerlineqarput.

Tikittussat killilersimaarneqalerput

Nunatsinnut tikittussat tamarmik naammassillutik akiuussusersorneqarsimanissaat marlunngorpamiit atuutsinneqalissaat. Nunatsinneersunut angerlalersunut tamanna atuutsissanngilaq. Maleruaqqusarlu taanna augustip 24-ata tungaanut atuutsunneqassaaq.

Upernavimmi Aasiannilu malueqqusat augustip 24-anut sivitsorneqarput. Sisimiunilu aamma maanna maleruaqqusat taakkua atuutsinneqalerlutik. Oqartussat tusagassiortunik sisamanngornermi katersortitsinerminni taama paasissutsissiipput.

Illoqarfinniit pineqartuniit angallanniaraanni aaqqissuusanulluunniit peqataaniaraaanni aallarniaraanniluunniit naammassilluni akiuussusersorneqarsimanissaq coronamilluunniit tunillatsissimannginnermik uppernarsaamik akunnerni 48-ini pisoqaasusilimmik takutitseqqaartoqassaaq.

Inuit katerissinnaasut amerlanerpaamik 20-iusinnaapput, illoqarfinnilu pineqartuni kikkut tamarmik ornittagaanni qanermut assiaquteqarnissaq aamma piumasaqaataavoq.

Sisimiuni misissuisarfissamik maanna pilersitsisoqaleruttorpoq.

Sarfaq Ittuk maanna kujataanniit avannamukaleruttorpoq. Innuttaasut umiarsuarmut ikisussat naammassillutik akiuussusersorneqarsimasariaqarput.

Akiuussusersuinerit tunillatsinnerlu

Kujataani Nuummilu tunillaasuuneq annikillisimasoq aqunneqarsinnaasorlu, Nunatta Nakorsaanerata erseqqissaatigaa.

- Kalaallit Nunaanni akiuussusersorneqarlutik aallartissimasut maanna 37.000-ingajaapput. Tamannalu ajunngilluinnarpoq, sumiiffinni assigiinngitsuni tuniluuneq taamaasilluni pakkersimaarneqarsinnaavoq, Henrik L. Hansen oqarpoq.

Tasiusami qulit tunillatsissimapput Upernavimmilu 16-it. Taakkunannga tunillatsissimasut inuusupput agguaqatigiisillugulu 31-inik ukioqarlutik. Tunillatsittut akornanni tallimat naammassillutik akiuussusersorneqarnikuupput.

- Inuusuttut akornanni tuniluuttoqarpoq. Tuniluuneq unitsinngikkutsigu utoqqaat, naartusut milutsitsisullu aamma tunillanneqarsinnaanngussapput. Taamaattumik taakkua akiuussusersorneqarnissaat pingaaruteqarpoq.

Sumiiffinni allami aamma inuusuttut akornanni tuniluuttoqarpoq.

Sisimiut annertuumik eqqugaaqqavoq. Tunillatsissimasut illoqarfiup iluani sumiiffiit assigiinngitsuneersuupput tamarmillu imminnut attaveqarsimanatik. Tunillatsittunit inuusuttut amerlanerupput, taakkullu naammassillutik akiuussusersorneqarsimanatik. Sisimiuni tunillatsittut akornanni taamaallaat ataaseq naammassilluni akiuussusersorneqarsimavoq.

- Sisimiuniit Kangerlussuarmut Nuummullu tunillaasuisoqarsimasinnaavoq. Kangerlussuarmi tunillaasuuttoqaratarsinnaanera malinnaaffigaarput. Kangerlussuarmimi tuniluuttoqaratarsinnaavoq, Nunatta nakorsaanera oqarpoq.

Atualertussat

Meeqqat inuusuttullu nuna tamakkerlugu atualerneranni persuarsiutigineqartussaapput. Múte B. Egedep kaammattuutigaa ilinniarfiit assigiinngitsut attavigineqassasut paasissutissanik ujartuinermi. Inuusuttut ilinniariartussat akiuussusersorneqanngitsut illoqarfigisaminniit aallarsinnaatitaasut, oqartussat paasissutissiissutigaat. Illoqarfiit immikkut maleruaqqusanik maanna atuutsitsiffiusuni aamma tamanna atuutsissaaq.

Coronavirusip tuniluunissaa pakkersimaarfiginiarlugu meeqqat atualernissaanut kaffillernissat kinguartinneqarnissaat, Múte B. Egedep siunnersuutigaa.