kommunimut qinersineq
Marloqiusamik qinigaaffillik sakkortuumik isornartorsiorneqartut
Kommunimut qinersinissamut qinigassanngortittut arlallit Inatsisartunut ilaasortaareersut, Inuit Ataqatigiinneersup Malene Lyngep maluginiarpaa.
Ilanngutassiami 'Marloqiusamik qinigaaffillit, qujaannarpunga!'-mik qulequtaqartumi Inuit Ataqatigiinneersoq Malene Lynge, kommunimut qinersinissamut qinigassanngortittut Inatsisartunut ilaasortaareersut sakkortuumik isornartorsiorpai.
Marloqiusamik qinigaaffilippassuit
Kommuneqarfik Sermersuumi kommunalbestyrelsimut ilaasortaanermini ullup akunneri 24-t naammatsinniarneri ajornakusoortartoq misigisimasarpoq.
- Sermersuumi qinigassanngortittut allattorsimaffiat qissimigaarakku, qinigassanngortittut arlallit qinigaassagunik kommunalbestyrelsimi Inatsisartunilu ilaasortaalissapput - ilaallumi borgmesterinngornissamut piukkupput. Ataatsikkut piffinni marlunniinnissartik eqqarsaatiginerpaat?, taanna aperaaq, nangillunilu:
- Inatsisartuni kommunalbestyrelsinilu ataatsimiititaliani suliassaqarfippassuaqartuni pappiararpassuarnillu pissarsiviusartuni sulissagaanni isumagisassat tamarmik isumagineqarsinnaappat - tamatigullu malinnaaqqissaartoqarsinnaava?
Pitsaassusermut sunniuteqartartoq
Marloqiusamik qinigaaffeqaraanni politikkikkut sulinerup pitsaassusaanut sunniuteqartarnissaa Melene Lyngep ernumassutigaa.
- Tamanna innuttaasut soqutigisarinerpaat? Kommunip soqutigisarinerpaa? Kalaallit Nunattalumi soqutigisarinerpaa? Qanoq ilissi isumaqarpisi?
Sermersuup kommunalbestyrelsiani ukiaq ulapaarfiunerpaasartoq taassuma oqaatigaa, tassani missingersuutit 2 milliard koruuninik naleqartut aaqqissuunneri aallartinneqartarput. Piffissamilu tassani Inatsisartuni ataatsimiinneq aallartittarpoq.
- Tamaanna naammassineqarsinnaava - imaluunniit politikkikkut sulinermi kinguneqartitsisarpa? Pitsaasusaanut kinguneqartitsisinnaanera ernumassutigaara, Malene Lynge oqaaseqarnermini allappoq.