Marlunnik qinigaaffeqarneq: Inatsisartuni ilaasortat Folketingimut qinigassanngortipput

Aleqa Hammond (NQ), Pele Broberg (PN) aamma Bentiaraq Ottosen (A).

Taakku Inatsisartuni ilaasortaapput, maannalu Folketingimut qinersinissamut qinigassanngortillutik. Folketingimut qinigaassagunik taamaasilluni marlunnik qinigaaffeqalersinnaapput.

Folketingimut qinigaassagunik Inatsisartuniiginnassanersut Sermitsiaq.AG-mit aperigineqarput.

Nunatta Qitornaanit Aleqa Hammond:

- Marlunnik qinigaaffeqarneq Nunatta Qitornaanit aporfissatut isigineqanngilaq. Marlunnik qinigaaffeqarneq iluaquteqarluartoq isumaqarpugut, tamarmik sunniuteqarluarfigineqarsinnaammata, oqarpoq.

Taamatut marlunnik qinigaaffeqarniaraanni politikkikkut misilittagaqarluartariaqartoq isumaqarpoq, tassami ulapinnarlunilu ilaquttat sivisuumik qimaqqasariaqartartut tikkuarpaa.

- Marlunnik qinigaaffeqarninni Nunatsinni najugaqarpunga, taamaattumik ataatsimiigiarlunga angalaqattaartarpunga. Kalaallit Nunaat pillugu folketingimi ataatsimiititaliami siulittaasuuvunga, kalaallimik siulittaasoqarteqqilerlugu. Naalagaaffeqatigiinneq oqallisaanerulernikuusoq akuulluarfigaara, tassami Nunatta inissisimanera nunanu tamalaaniittunut soqutigineqartuuvoq. Kina aamma USA-p Natomik Danmarkimillu qanittumik suleqateqarnera Issittoq soqutigineqarluarpoq, Aleqa Hammond oqarpoq.

Partii Naleqqamit Pele Broberg:

- Partii Naleqqami marlunnik qinigaaffillit ajoriffissaqartinngilagut. Taamaakkaluartoq Folketingimut isissaguma imaanngilaq marlunnik qinigaaffeqassasunga. Folketingimut isissaguma nalunngilara suliassarpassuaqassallunga, Inatsisartuni ilaasortaanissara immaqa piffissaqarfigissanngilara. Isissaguma Inatsisartuni sulinngiffeqaqqaalaassaanga sivikitsumik, oqarpoq.

Folketingimi suliassat qanoq amerlatigissanersut takoqqaarlugit marlunnik qinigaatitaqassanerluni imaluunniit Inatsisartunit sulinngiffeqassanerluni aalajangerumaarpaa.

- Partiimit Folketingimi ilaasortaatitaqarnikuunngilagut, taamaattumik suliassat takoqqaarusuppakka partii paaseqatigalugu aalajanginnginninni. Malunnaatilimmik suleqataarusuppugut, taamaattumik eqqarsaatigeqqaagassaavoq marlunnik qinigaaffeqassanerlunga imaluunniit ataasiinnarmik qinigaaffeqassanerlunga, Pele Broberg oqarpoq.

Atassummit Bentiaraq Ottosen:

- Nammineerlunga aalajangerumaarpara marlunnik qinigaaffeqassanerlunga, tassami partiip marlunnik qinigaatitaqarneq ajoriffissaqartinngilaa. Pitsaanerpaamik qanoq sulisinnaanerlunga misissorumaarpara. Ataasiinnarmik periarfissaqassaguma Folketingimi ilaasortaarusunnerussaanga, tassani Nunatsinnut sunniuteqarluarfiginerpaasara angorusukkakku. Marlunnik qinigaaffeqassanerlunga suli aalajanginngilara, qinersinerummi inernera aamma paaseqqaartariaqarparput, Bentiaraq Ottosen oqarpoq.