Marthap kissaatai: Meeqqat inuusuttullu atugaat pitsanngorsarneqassapput

Martha Abelsenip meeqqat inuusuttullu atugaat pillugit kissaatini danskit ministerertaavi, inunnik isumaginninnermut nunallu iluanut tunngatillugu ministeri Astrid Krag aamma inatsisinik atuutsitsinermut ministeri Nick Hækkerup, ataatsimeeqatiginerini tunniuppai.

Naalakkersuisut kissaatigaat, danskinik kalaallinillu inuttalimmik atituumik suleqatigiiliortoqassasoq, tassanilu Kalaallit Nunaanni kommunit peqataassasut.

Martha Abelsen tusagassiutinut nalunaaruteqarluni taama allappoq.

Suleqatigiit siunissaq ungasinnerusoq isigalugu Danmarkip Kalaallit Nunaat qanoq ililluni Tasiilami Kalaallillu Nunaata sinnerani meeqqat atugaat pillugit ikiuisinnaanera pillugu kaammattuuteqassaaq.

Marthap kissaatai

Martha Abelsenip erseqqissarpaa Namminersorlutik Oqartussat kommunillu ukiuni kingullerni arlalinnik suliniutinik aallartitsisimasut, suliniutillu taakku meeqqat inuusuttullu atugaannik pitsanngorsaanissamik siunertaqartut.

Peqqissutsimut Isumaginninnermullu Naalakkersuisoq taamaattoq aamma allanik kissaateqarpoq, nunatsinnimi meeqqat atugaat pitsanngorsarniarlugit Naalakkersuisut danskillu ministerii suleqatigiissutissaqarput.

Kissaatit ukuupput:

• Sulianut tunngasutigut sulisut, sulianik suliarinninnermi kommuninut ikiuuttussat, aamma kommunini sulianik suliarinnittartunik sanileralugit ilitsersuineq.
• Sulianut tunngasutigut sulisut katsorsaanermi ikiuussinnaasut .
• Danmarkimi suliffeqarfiit arlallit suleqatiginerannik patajaallisaaneq, taamaalilluni neqeroorutit katsorsaanermillu suliniutit patajaallisarniarlugit, aamma Kalaallit Nunaanni periarfissanik piginnaasanillu pitsanngorsaaneq qulakkeerniarlugu.
• Suliniuteqarneq, meeqqanik atornerluisoqarnermi, pinngitsaaliilluni atoqateqartoqarsimatillugu aamma persuttaasoqarsimatillugu imaluunniit taakku pillugit pasitsaassisoqarsimappat taakku pillugit suliani sukkasuumik iliuuseqartoqartartoq innuttaasut misiginiassammassuk.
• Pineqaatissiinermi sinaakkutinik atulersitsineq .
• Eqqunngitsuliortartut pillarneqarneranni inooqataanikkut akuulersitseqqiisumik katsorsaaneq kiisalu eqqugaasut inatsiseqartitsinikkut inissisimanerannik patajaallisaaneq.

- Siunissami suleqatigiinnissarput pillugu danskit ministeriinik pitsaasumik oqaloqatiginnittoqarsimavoq. Oqartussaqarfitta akornanni qanimut suleqatigiinnerput ingerlatiinnassagipput isumaqatigiittoqarpoq. Ministerit marluullutik Kalaallit Nunaat
siunissaq isigalugu sulianut tunngasutigut tapersersorniarlugu kissaateqarnertik oqaatigaat. Kissaatigisavut taakku danskit ministeriinit tusaatissatut tiguneqarput, kingusinnerusukkullu tamanut pitsaanerpaamik qanoq aaqqiissuteqarsinnaanerup
ujartornissaanut illuatungeriilluni oqaloqatigiinnissaq ingerlanneqassaaq, Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen tusagassiutinut nalunaaruteqarluni allappoq.