Meeqqat akiuussutissalersorneqarnerat eqqarsaasersuutigineqartoq

Misilittagarineqalersut misissuisimanerillu siulliit takutissimavaat, coronap allannguutaata Omikronip Deltatulli coronamik tunillatsissimasut napparsimatilertigisanngikkai. Peqatigitillugu Omikroni akiuussutissamut iluaqutaannginnerusarpoq.

Norgemi allannguummut Omikronimut tunngatillugu eqqarsaasersuutit tunngavigalugit aalajangertoqarsimavoq, meeqqanik aqqaneq-marluk inorlugit ukiulinnik akiuussutissalersuinissamik inassuteqaammik atorunnaarsitsinissaq.

Norgemi peqqinnissatigut oqartussat isumaqarput, meeqqat tallimaniit aqqanilinnut ukiullit akiuussutissalerneqarnissaannut sanilliullugu coronavirusimik tunillatsinnertik iluaqutigisinnaagaat.

Nunatsinni nakorsaaneq utaqqimaartoq

Nunatsinni nakorsaanerup Danmarkimiit nalunaaruteqartoqarnissaa utaqqimaarpaa, angajoqqaanullu kaammattuutigalugu meeqqatik suli akiuussutissalertittassagaat.

- Danmarkimit oqartussanillu allanit tamanna pillugu qanoq nalunaaruteqartoqassanersoq maannakkorpiaq utaqqimaarneqarpoq. Nalunaarutigineqartartut assigiinngitsut eqqumaffigisupilussuuakka, Henrik L. Hansen Sermitsiaq.AG-mut oqarpoq.

Nunatsinni nakorsaanerup erseqqissaassutigaa, akiuussutissalersuinissamut pilersaarut pilersaarutaasutut maannamut ingerlaannassasoq.

Norgemit nalunaaruteqartoqareersoq, Danmarkimi meeqqat nakorsaasa Peqqissutsimut Aqutsisoqarfimmut kaammattuutigaat, Danmarkimi meeqqat akiuussutissalersorneqarnissaannik inassuteqaat ingerlatiinnarneqassanersoq misissoqqullugu.

Akiuussutissap qanoq sunniuteqartigisarnera paaserusukkaa

Nunatsinni nakorsaanerup nassuerutigaa, maannamut paasissutissaagallartut takutissimagaat, akiuussutissaq Omikronimik tunillatsissimasunut sunniuteqarpallaarneq ajortoq. Qanorlli sunniutikittartiginersoq qitiusut apeqqutaasoq taanna isumaqarpoq.

- Akiuussutissap tuniluuttoqarnerata ineriartornerat qanorpiaq sunniuteqartigisarnera pillugu kisitsisinik amigaateqarpugut.

Norgemi aalajangertoqarsimaneranut akiuussutissap Omikronimut sunniutigisartagai tunngavigineqarsimapput, Danmarkimili siorna novembarip qaammataani allannguut Delta tunngavigalugu isummertoqarsimalluni. Taamaammat meeqqat nakorsaasa Peqqissutsimut Aqutsisoqarfikmut kaammattuutigaa, tamanna eqqarsaatigeqqinneqassasoq.

Nunatsinni nakorsaanerup Danmarkimi oqartussanik qanimut suleqateqarnini pissutigalugu nunatsinni periusissiamik allannguitinnani Danmarkimit nalunaaruteqartoqarnissaa utaqqimaarpaa.

- Tusagassiorfinnit paasissutissat kisiisa pinnagit aamma allanit paasissutissat pissarsiarisarpavut. Taamaammat Danmarkimi Peqqissutsimut Aqutsisoqarfiup nalunaarutaanik malinninnissaq pissusisssamisoortutut isigaara, taanna oqarpoq.

Kingunipiloqartarnera kisimi pineqanngitsoq

Meeqqanik akiuussutissalersuiniarnermi pingaarnertut tunngaviupput, tuniluuttoqalernissaata pinngitsoortinniarneqarnera aamma sanngiinnerusut tunillatsissinnaanerannut illersuiniarneq, nunatsinni nakorsaaneq oqarpoq. Norgemili isumaqartoqarpoq, tunillatsissinnaasunik illersuiniarneq Omikronimillu tunnillaassuisinnaanerup annikinnera pissutigalugit, meeqqanik amerlanertigut coronamik napparsimarujulerneq ajortunik akiuussutissalersuinissaq isumaqanngitsoq.

Nunatsinni nakorsaanerup erseqqissaassutigaa, akiuussutissap kingunipiloqarsinnaanera matumani pineqanngitsoq.

- Arlaannilluunniit nalunaaruteqartoqarsimanngilaq, meeqqat akiuussutissalersorneqarnerannut atatillugu immikkut ulorianartoqartoq. Matumani tamanna aalajangiisuulluinnarpoq. Matumani pineqarpoq, meeqqanik akiuussutissalersuinerup maannakkorpiaq tuniluuttoqarneranut siunissamilu tuniluuttoqarsinnaaneranut qanoq sunniuteqarsinnaanera, Henrik L. Hansen oqarpoq.

Nunami maani meeqqat tallimaniit aqqanilinnut ukiullit 545-t sapaatip-akunnerata siuliata aallartinnerani siullermeersumik akiuussutissalerneqarsimapput. Tassa meeqqat taamatut ukiullit 10.1 procentii akiuussutissalerneqarsimapput.

Meeqqanit akiuussutissalerneqarsimasunit 344-t Nuummi akiuussutissalerneqarsimapput. Tassa Nuummi meeqqat taamatut ukiullit 20,1 procentii siullermeersumik akiuussutissalerneqarsimallutik.