akunnernik annaasaqassanngillat
Meeqqat atuarfiata AWG piareersimaffigaa
AWG-p ingerlanneqarnerani Nuummi atuartut atuartinneqartuaannarlutillu paarineqartuaannassapput
Kommuneqarfik Sermersooq naapertorlugu angajoqqaat arlallit ernumagisimavaat Arctic Winter Games atuartunut qanoq sunniuteqarumaarnersoq.
Kommunilli meeqqat paarineqartarnissaat atuartinneqartarnissaallu isumaginiareersimavaa, unammiuaarnerit nalaanni atuarfiit unammiuartortunit avataaneersunit najugaqarfittut atorneqartussaagaluartut.
– Ataqatigiissinniagassarpassuaqarsimavoq, isumaqarpugulli angusaqarsimalluta tamarmik naammagisinnaasaannik. Meeqqat tamarmik paarineqarlutillu atuartinneqartassapput, Kommuneqarfik Sermersuumi Atuarfinnut Paaqqinnittarfinnullu pisortaq Jesper Madsen oqarpoq.
Sivisunerusumik atuanngiffeqassapput
Nuummi meeqqat atuarfianni atuartut AWG-p kingunerisaanik ukiuunerani sivisunerusumik atuanngiffeqassapput, tamannali pissutigalugu akunnernik atuarfissaminnik annaasaqassanngillat.
– Ukiumut atuarfiusumut matumunnga pilersaarusiornermi tamanna eqqarsaatigineqareersimavoq, ullullu tamakkua piffissanut allanut nuunneqarsimapput. Tassa imaappoq, atuartut tamarmik pisarnertut ukiumi atuarfiusumi ulluni 200-ni atuartinneqassapput, Kommuneqarfik Sermersooq paasissutissiivoq.
Nulunaarsimasunik paaqqinninneq
Meeqqat atuarfiup paaqqinnittarfianut fritidshjemmimulluunniit nalunaartissimasut aamma sunnerneqangaassanngillat. Kommunimi atuarfiit amerlanersaanni atuartunik paaqqinniffiit AWG-mit sunnerneqassanngillat. Tassa meeqqat tamarmik paarineqartassapput atuassanngikkaluaraangamilluunniit, Kommuneqarfik Sermersooq paasissutissiivoq.
Kisiannili unammiuaarnerit ingerlanneqarneranni meeqqat Atuarfik Hans Lyngemi paarineqarsinnaassanngillat. Taamaattumik ininik allanik nassaartoqarsimavoq, meeqqat taakkunani sulisunit ulluinnarni paarsisiminnit paarineqartassallutik.